Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 169 Hüküm no: 173 Orijinal metin no: [41a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Ağa b. Mustafa’nın Rus asıllı kölesi Kaytas b. Abdülhay’ı âzat ettiği Düstûr-ı mükerrem Silahdâr Mustafa Paşa’nın kethüdâsı olan umdetü’l-emâcid ve’l-ekârim Mehmed Ağa b. Mustafa tarafından i‘tâk-ı âti’l-beyânı ikrâra vekîl olup vekâleti etbâ‘ından Süleyman Bey b. Şaban ve Mustafa b. Şaban şehâdetleri ile şer‘an sâbite olan İbrahim Bey b. Abdullah meclis-i şer‘-i hatîr[de] bi’l-vekâle ikrâr ve i‘tirâf edip müvekkile-i mûmâ-ileyh ağa yedinden ve tasarrufundan mülk ve hakkı olup kendiye rıkkını mu‘terif olan açık kaşlı gök gözlü orta boylu sağ elinin başparmağı maktû‘ olup, Rûsiyyetü’l-asl müslimetü’l-millet Kaytas b. Abdülhay’ı hasbeten lillâhi’l-hallâk tahrîr ve i‘tâk eyledi. Ol dahi sâyir ahrâr-ı asliyyîn gibi hür olup, üzerinde hakk-ı velâdan gayrı müvekkilem mezbûrun hakkı kalmadı dedikde, mukırr-ı mezbûrun bi’l-vekâle cârî ve sâdır olan ikrâr mezbûr Kaytas talebiyle ketb olundu. Fi’l-yevmi’s-sâbi‘ aşer min şehri Rebî‘ulâhir li sene tis‘a ve hamsîn ve elf. Şuhûdü’l-hâl: Osman Ağa b. Hüseyin, Ahmed Bey b. Bâli, Hüseyin Bey b. Sefer, İsa Bey b. Ahmed, Mustafa Bey b. Abdullah, Mustafa Bey b. Abdullah, Yahya Bey [b.] Zekeriya, Ahmed Çelebi b. Abdurrahman.