Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 170 Hüküm no: 175 Orijinal metin no: [41b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ayşe Hâtun’un ölen kardeşinin kocası Hüseyin Bey b. Abdullah aleyhindeki alacak davasının reddedildiği Mahmiye-i İstanbul’da Ali Bey mahallesinde sâkine iken vefât eden İsmihân Hâtun bt. Hasan Bey’in verâseti zevc-i metrûku Hüseyin Bey b. Abdullah nâm cündîye ve li ebeveyn karındaşı kızı Feriha bt. Mehmed’e münhasıra olduğu şer‘an mütehakkık oldukdan sonra mezbûre Ayşe Hâtun meclis-i şer‘de merkūm Hüseyin Bey’in mahzarında üzerine takrîr-i da‘vâ edip mezbûr Hüseyin Bey zimmetinde mûrisem müteveffâ-yı mezbûrenin üç bin cedîd râyic fi’l-vakt akçe nikâhı ma‘kūd mehr-i müeccel hakkı olup kable’l-ahz vefât etmekle terekesinden olup bana isâbet etmekle taleb ederim dedikde, gıbbe’s-suâl mezbûr Hüseyin Bey cevâbında hâl-i sıhhat ve nefâz-ı tasarrufâtında zevcem mezbûre mehr-i mezbûr üç bin akçeyi bana hibe ve teslîm eyledi dedikde, gıbbe’l-istintâk husûs-ı mezbûru mezbûre Ayşe inkâr edicek, mezbûr Hüseyin Bey’den sıdk-ı makālini mübeyyin beyyine taleb olundukda udûl-i ahrâr-ı ricâl-i müslimînden Hüseyin Halîfe b. Yakub el-müezzin meclis-i şer‘a li ecli’ş-şehâde hâzırân olup gıbbe’l-istişhâd her biri münkir-i mezbûre muvâcehesinde şehâdet edip fi’l-hakīka müteveffât-ı mezbûre İsmihân Hâtun hâl-i sıhhat ve nefâz-ı tasarrufâtında zevci mezbûr Hüseyin Bey’in zimmetinde nikâhı ma‘kūd olan üç bin cedîd râyic fi’l-vakt akçe mehr-i müeccelini biz huzûrumuzda zevci mezbûr Hüseyin Bey’e hibe ve zimmetini ibrâ eyledi. Biz bu husûsa bu vech üzre şâhidleriz şehâdet dahi ederiz deyû her biri edâ-yı şehâdet-i şer‘iyye eylediklerinde gıbbe ri‘âyeti şerâyiti’l-kabûl şehâdetleri makbûle oldukdan sonra müecceli mezbûrdan Hüseyin Bey’in berâ’et-i zimmetine ve müdde‘iye-i merkūmenin da‘vâ-yı meşrûhasından men‘ine hükm olunup mâ hüve’l-vâki‘ bi’t-taleb ketb olundu. Sene 1059. Şuhûdü’l-hâl: Halil Ağa b. Ali, el-Hâc Veli Ağa b. Mustafa tâbi‘-i Silahdâr, Mustafa Halîfe b. Ali, Mustafa Çelebi b. Mehmed.