Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 171 Hüküm no: 176 Orijinal metin no: [41b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hacı Mustafa b. Ömer’in bağını oğulları Ahmed ve Mehmed’e sattığı ve borçlarını karşıladığı Medîne-i İznikmid kazâsına tâbi‘ Değir[men]deresi nâm karyede sâkin el-Hâc Mustafa b. Ömer nâm kimesne meclis-i şer‘de sulbî kebîr oğulları işbu râfi‘ül-kitâb Ahmed ve Mehmed nâm kimesneler mahzarlarında tav‘an ikrâr ve ikrâr edip işbu akdin sudûruna değin silk-i mülkümde ve yedimde hakkım olup karye-i mezbûre kurbunda Kuruçeşme nâm mevzi‘de vâki‘ bir tarafı İshak Çelebi b. Ali mülküne <> ve bir tarafı ba‘zan Mehmed Reis ve ba‘zan el-Hâc Mehmed mülklerine ve bir tarafı ba‘zan merhûm Ali Bey b. Nasuh Paşa veresesi ve ba‘zan Berber Resûl mülklerine müntehî bir kıt‘a cemî‘ bağımı âmme-i hukūk ve evhâd ve râceti? ile oğullarım mezbûrân Ahmed ve Mehmed’e yetmiş beş bin fıddî cedîd râyic fi’l-vakt akçeye bâtten bey‘ ve teslîm edip onlar dahi iştirâ ve tesellüm eyledikden sonra semeni merkūm yetmiş beş bin cedîd akçenin altmış beş bin akçesin mahmiye-i İstanbul’da Nişancı Paşa-yı Atîk mahallesinde Fâtıma Hâtun Vakfı’na zimmetimde deyn olan altmış beş bin cedîd akçe ile vakf-ı mezbûra mütevellî olan işbu hâzır bi’l-meclis Mehmed Çelebi b. İsmail’e oğullarım müşteriyân-ı mezbûrân Ahmed ve Mehmed üzerlerine cümlemizin rızâlarıyla havâle-i sahîha-i şer‘iyye ile havâle eyledim. havâle-i mezbûreyi dahi muhtâlün leh olan mütevellî-i mezbûr bi’t-tevliye kabûl edip semen-i mârrü’z-zikrden mezkûrân Ahmed ve Mehmed zimmetlerinde bâkī ancak on bin akçe hakkım kalmışdır dedikde mukırr-ı merkūm el-Hâc Mustafa ber vech-i muharrer üzre vicâhen tasdîk ve şifâhen tahkīk edicek, mâ hüve’l-vâki‘ bi’t-taleb ketb olundu. Fi’l-yevmi’s-sâmin aşer min şehr-i Rebî‘ulâhir li sene tis‘a ve hamsîn ve elf. Şuhûdü’l-hâl: Ahmed Çelebi b. Mustafa, Mustafa b. Ahmed, Receb Dede b. Himmet, Musa Dede b. Ahmed, Emrullah Çelebi b. Derviş, Sefer Beşe b. Abdullah, Seyyid Hüseyin b. Musa, Ahmed b. Musa.