Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 186 Hüküm no: 192 Orijinal metin no: [45b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kezban bt. Hasan’ın, mûrisi Cafer Bey b. Nasuh’un terekesinden hissesine düşen miktarı diğer vâris Kadri Bey’den teslim aldığı Mahmiye-i İstanbul’da Dülbendçi Hüsam mahallesinde sâkin iken vefât eden Cafer Bey b. Nasuh nâm Bevvâb-ı Sultânî’nin verâseti zevce-i metrûkesi Kezban Hâtun bt. Hasan ile sulbî kebîr oğlu Kadri Bey’e münhasıra olduğu şer‘an mütehakkık oldukdan sonra Kezban Hâtun meclis-i şer‘-i hatîr-i lâzımü’t-tevkīrde müteveffâ-yı merkūmun muhallefâtına vâzı‘u’l-yed olduğu şer‘an sâbit olan işbu râfi‘ül-kitâb merkūm Kadri Bey mahzarında tav‘an ikrâr ve i‘tirâf edip mûrisimiz müteveffâ-yı mezbûr Cafer Bey’in ismi mâl ıtlâk olunur cemî‘ muhallefâtının sekiz sehimden bir sehim hisse-i şer‘iyyem mukābelesinde şerâyit-i sıhhat-i sulhu hâvî ve muvâza‘adan ârî tehârüc-i şer‘ tarîki üzre muhallefât-ı müteveffâ-yı mezbûrdan iki bin cedîd râyic fi’l-vakt akçe ve meclis-i sulhda müşârun-ileyh bin akçe kıymetli beş ayaklı sahan ve bir beledî yorgan ve bir beyaz velence ve bir yeşil müsta‘mel kuzu kürkü kaplı dânelerinden ferâceli yedinden kabz eyledim. Min ba‘d mezbûr Kadri Bey üzerine müteveffâ-yı mezbûr muhallefâtına müte‘allika da‘vâ ve nizâ‘ım yokdur dedikde, gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’t-tâsi‘ aşer min şehri Rebî‘ulâhir li sene tis‘a ve hamsîn ve elf. Şuhûdü’l-hâl: Halil b. Ali, Salih Halîfe el-müezzin, İsmail b. Cafer, Rıdvan b. Abdülkerim, Mehmed b. Nasuh, Mustafa b. Cafer, Yahya b. Zekeriya, Abdülkerim er-râcil.