Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 185 Hüküm no: 191 Orijinal metin no: [45b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kazaz Ahmed Çelebi b. Mustafa’nın menzil hissesini Raziye bt. Mehmed’e sattığı Mahmiye-i İstanbul’da Davudpaşa kurbunda Kasab İlyas mahallesinde sâkin Kazaz Ahmed Çelebi b. Mustafa meclis-i şer‘-i hatîr-i lâzımü’t-tevkīrde mahalle-i mezbûrede sâkine Raziye bt. Mehmed nâm hâtunun sadrî oğlu ve tarafından şirâ-i âti’l-beyâna vekîli olup vekâleti bimâ-hüve nehcü’s-sübût şer‘an sâbite olan İsmail Çelebi b. Mustafa mahzarında tav‘an ikrâr ve i‘tirâf edip mahalle-i mezkûrda vâki‘ bir tarafı kendi mülküme ve bir tarafı Murad b. ( ) mülküne ve iki tarafı tarîk-i âmma müntehî dâhiliye ve hâriciyesi dört bâb fevkānî ve iki tahtânî odalar ve iki kenîfi ve bi’r-i mâ’î ve havlu ve bir bâb dükkânı müştemil olan cemî‘ menzil nısf-ı şâyi‘i benim mülk-i mûresim ve nısf-ı şâyi‘i âharı dahi mezbûr İsmail Çelebi’nin mülk-i mûresi olup hâlâ zikr olunan menzilde ve dükkânda mülküm ve yedimde hakkım olan nısf-ı şâyi‘i ve kâffe-i hukūk ve’l-merâfıkı ile mezbûr İsmail Çelebi’ye yirmi dört bin fıddî cedîd râyic fi’l-vakt akçeye tarafeynden îcâb ve kabûlü hâvî bey‘-i bâtla bey‘ ve teslîm eyledim. Mezbûr İsmail Çelebi dahi zikr olunan nısfı şâyi‘i müvekkilesi mezbûre Raziye Hâtun için iştirâ ve tesellüm edip semen-i mezkûr yirmi dört bin akçeyi bana def‘ ve teslîm edip ben dahi tamâmen ahz u kabz ve istîfâ eyledim. Min ba‘d bey‘ eylediğim nısf şâyi‘i mezkûr, mezbûre Raziye Hâtun’un mülk-i müşterâsı ve hakk-ı sırfıdır dedikde mukırr-ı mezbûr Ahmed Çelebi’yi ikrâr-ı meşrûhunda vekîl-i mezkûr vicâhen tasdîk ve şifâhen tahkīk edicek, mâ hüve’l-vâki‘ bi’t-taleb ketb olundu. Fi’l-yevmi’s-sâlis ve’l-ışrîn min şehri Rebî‘ulâhir li sene tis‘a ve hamsîn ve elf. Şuhûdü’l-hâl: Ahmed Çelebi b. Osman Kazzâzbaşı, Mustafa Çelebi Karakaşzâde, Mehmed Çelebi b. Ahmed el-kazzâz, Halil Çelebi b. Osman el-kazzâz, Mustafa Çelebi b. Süleyman el-müezzin, Süleyman Çelebi b. Mustafa, Mehmed b. Abdullah el-Hayyât.