Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 187 Hüküm no: 194 Orijinal metin no: 46a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mumcu Mehmed Beşe b. Ali’nin vârisleri Sa‘di, Zekeriya ve Abdülalim’in, Beytülmâl Emini İlyas Ağa b. Sinan’da olan alacaklarını tahsil ettikleri Fi’l-asl medîne-i Kayseriye ahâlîsinden olup Dergâh-ı âlî yeniçerilerinin Otuz Sekizinci Bölüğü’nden olup bundan akdem vefât eden Mumcu Mehmed Beşe b. Ali’nin verâseti li ebeveyn er karındaşları Sa‘di ve Zekeriya ve Abdülalîm’e münhasıra olduğu şer‘an mütehakkık oldukdan sonra merkūm Sa‘di kendi tarafından asâleten ve karındaşları merkūmetân Zekeriya ve Abdülalîm tarafından husûs-ı âti’l-beyâna vekîl olup bimâ-hüve nehcü’s-sübût şer‘an vekâleti sâbite oldukdan sonra vekâleten meclis-i şer‘-i hatîr-i lâzımü’t-tevkīrde bi’l-fi‘l Beytülmâl-ı râcilîn emîni olan İlyas Ağa b. Sinan tarafından dahi ikrâr-ı âti’l-beyânı tasdîka vekîl olup bimâ-hüve nehcü’s-sübût şer‘an vekâleti sâbite olan Mehmed Beşe b. Mustafa mahzarında bi’l-asâle ve’l-vekâle tav‘an ikrâr ve i‘tirâf edip mûrisimiz merkūm Mumcu Mehmed Beşe vefât eyledikde zâhirde vârisi ma‘rûfu olmamak zu‘muyla mûmâ-ileyh İlyas bi hükmi’l-emâne terekesinden iki bin fıddî râyic fi’l-vakt akçesini ahz u kabz eylemişdir. Hâlâ ba‘de isbâti’l-verâset meblağ-ı mezbûr iki bin akçeyi emîn-i mûmâ-ileyh yedinden asâlet ve vekâletim hasebiyle tamâmen ahz u kabz eyledim. Min ba‘d mûrisimiz müteveffâ-yı mezbûr Mumcu Mehmed Beşe tereke-i mezbûresinden emîn-i müşârun-ileyh yedinde bir akçe ve bir habbe hakkım kalmadı dedikde mukırr-ı mezbûrun asâleten ve vekâleten cârî olan ikrârını vekîl-i mezbûr vicâhen tasdîk edicek, mâ vaka‘a bi’t-taleb ketb olundu. Hurrire fi’l-yevmi’l-ışrîn min şehri Rebî‘ulâhir li sene tis‘a ve hamsîn ve elf. Şuhûdü’l-hâl: Malkoç Efendi, Yahya Çelebi el-nâzır, Hasan Efendi el-kâtib, Osman Çelebi b. Ahmed, Yahya Bey b. Zekeriya.