Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 188 Hüküm no: 195 Orijinal metin no: [46a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hacı Bayezid b. Said’in, Tunus Kadısı Mehmed Efendi’de kahve satışından olan alacağını tahsili Mahmiye-i İstanbul’da Üskübî mahallesinde sâkin işbu râfi‘ül-kitâb el-Hâc Bayezid b. Said nâm kimesne meclis-i şer‘-i şerîfde sâbıkan Tunus kadısı olan Mehmed Efendi el-Ezherî mahzarında üzerine takrîr-i da‘vâ edip mezbûr Mehmed Efendi zimmetinde vakıyyesi beynimizde ma‘lûm yedimden müşterâ ve makbûz kahve semeninden üç yüz elli riyâlî kuruş hakkım vardır. Suâl olunup alıverilmek matlûbumdur dedikde, gıbbe’s-suâl mezbûr Mehmed Efendi cevâbında fi’l-hakīka minvâl-i meşrûh üzre kahve semeninden işbu müdde‘iye zimmetimde edâsı vâcib üç yüz elli riyâlî kuruş deynim vardır deyû tav‘an ikrâr etmeğin ikrâr mûcebince meblağ-ı mezkûr üç yüz elli riyâlî kuruşun müdde‘î-i mezbûra edâsı merkūm Mehmed Efendi üzerine ilzâm olunup mâ hüve’l-vâki‘ bi’t-taleb ketb olundu. Fi’l-yevmi’s-sâlis ve’l-ışrîn min şehri Rebî‘ulâhir li sene tis‘a ve hamsîn ve elf. Şuhûdü’l-hâl: Ahmed Çelebi b. Abdülbâkī, Osman Çelebi b. mehmed, el-Hâc Hüseyin b. Mehmed, İsa b. Ahmed.