Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 188 Hüküm no: 196 Orijinal metin no: [46a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sefer Dede b. Abdullah’ın mükâteb kölesi Dilaver’de olan alacağını taksitlendirdiği Mahmiye-i İstanbul’da Kuşbazlar kurbunda Emin Bey mahallesinde sâkin a‘mâ sâil Sefer Dede b. Abdullah meclis-i şer‘-i hatîrde kendinin abd-i müşterâsı olup yine kendiye rıkkını mu‘terif olan işbu açık kaşlı, ahmerü’l-levn vasatü’l-kāme Gürciyyü’l-asl müslimetü’l-millet Dilaver nâm a‘mâ abd-i mahzarında tav‘an rağbeten ikrâr ve i‘tirâf edip mezbûr Dilaver benim abd-i memlûküm olup mezbûrede bundan akdem altı bin fıddî cedîd râyic fi’l-vakt akçe üzerine kitâbeti kat‘ edip ol dahi kitâbet-i mezbûreyi [kabûl] eyledikden sonra bana bin üç yüz elli mezbûru’n-na‘t akçesini edâ ve îfâ edip bâkī dört bin altı yüz elli akçesi kalıcak meblağ-ı bâkī dört bin altı yüz elli akçenin iki bin akçe mütâlebesinden mezbûr Dede’nin zimmetini ibrâ edip bedel-i kitâb-ı mezbûrdan ancak iki bin altı yüz elli akçe kaldıkda meblağ-ı bâkī iki bin altı yüz elli akçeyi her otuz günde ikişer akçe olmak üzre dört yüz yirmi güne değin mezbûr Dilaver’e te’cîl eyledikde mukırr-ı mezbûr Sefer Dede’yi ikrâr-ı meşrûhunda el-mukarru lehü’l-mezbûr Dilaver vicâhen tasdîk ve şifâhen tasdîk edicek, mâ hüve’l-vâki‘ bi’t-taleb ketb olundu. Fi’l-yevmi’s-sâbi‘ aşer min şehri Rebî‘ulâhir li sene tis‘a ve hamsîn ve elf. Şuhûdü’l-hâl: İbrahim Çavuş b. Rıdvan, Mustafa Çelebi b. Hasan, Hacı Mustafa Çelebi b. Abdullah el-Yesârî, Hasan Çelebi b. Yusuf.