Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 189 Hüküm no: 198 Orijinal metin no: [46b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma bt. Osman’ın vasîsi vasıtasıyla, Haffâf Hacı Mehmed b. Maden’in emanetinde olan eşya ve paraları teslim aldığı Vilâyet-i Rumeli’nde medîne-i Gelibolu kazâsına tâbi‘ Behram-ı Kebîr karye sükkânından olup bundan akdem vefât eden Bayrakdar Odabaşı demekle ma‘rûf el-Hâc Osman Beşe b. Abdullah nâm müteveffânın verâseti sulbiye sagīre kızı Fâtıma’ya münhasıra olduğu şer‘an müte‘ayyin oldukdan sonra sagīre-i mezbûreye bir vasî ehem ve lâzım olmağla târih-i kitâb Muharremü’l-harâmında medîne-i mezbûrede kassâm-ı askerî olan Derviş Mehmed Efendi b. ( ) nasbı ile mansûb olan işbu sâhibü’l-kitâb Ali Çelebi b. el-Hâc Mehmed meclis-i şer‘-i hatîr-i lâzımü’t-tevkīrde mahmiye-i İstanbul’da Mehmed Ağa kurbunda Derviş Ali mahallesinde sâkin Haffâf el-Hâc Mehmed b. Maden mahzarında bi’l-vesâye üzerine takrîr-i da‘vâ edip vasîsi olduğum sagīre-i mezbûre Fâtıma’nın babası müteveffâ-yı mezbûr hâl-i hayâtında işbu hâzır bi’l-meclis üç Frengî yaldız altınını ve yirmi dokuz şerîfî altınını ve ma‘mûl altınını ve elli kıt‘a esedî kuruşunu ve altmış riyâlî kuruşunu ve bin dört yüz züyûf akçesini ve yüz yirmi sekiz paftalı bir sîm kuşağını ve on dirhem sebîke gümüşünü ve bir buçuk endâze kilâbdândan masnû‘ makrama şeridini ve elli aded hurda sırçasını ve altı aded seylânını ve elli sekiz aded hurda incisini ve bir değirmî yemenisini işbu Hacı Mehmed’e îdâ‘ ve teslîm edip ol dahi vech-i muharrer üzre ahz u kabz eyleyip hâlâ yedinde vedî‘adır. Mezbûr el-Hâc Osman vefât edip cemî‘ vedî‘a-ı meşrûha vasîsi olduğum sagīre-i mezbûreye irs-i şer‘î ile intikāl edip ben sagīre-i mezbûrenin cemî‘ tesviye-i umûruna medîne-i Gelibolu’da bin elli dokuz Muharremü’l-harâmında kassâm-ı askerî olan Mevlânâ Derviş Mehmed Efendi b. ( ) nasbı ile mansûb vasîsi olduğum cihetden eşyâ-yı mezkûre ve nukūd-ı mezkûrede velâyet-i hıfz ve zabt benim olmağın suâl olunup eşyâ-yı mezbûre ve nukūd-ı merkūmenin bana teslîm olunmasın taleb ederim deyû târih-i mezkûr ile müverraha olup mevlânâ-yı mûmâ-ileyh nasbı ve hat ve hatemini müştemile sıhhat-i şer‘iyye ibrâz eyledikde gıbbe’s-suâl mezbûr Haffâf el-Hâc Mehmed eşyâ-yı mezkûre yedinde müteveffâ-yı mezbûrun îdâ‘ eylediği terekesi olduğunu ikrâr ve müdde‘î-i mezbûr vech-i muharrer üzre vesâyetini inkâr etmeğin müdde‘î-i mezbûrdan da‘vâ-yı meşrûhasını mübeyyin beyyine taleb olundukda udûl-i ahrâr-ı ricâl-i müslimînden olup, medîne-i Gelibolu kazâsına tâbi‘ Kilidü’l-bahr’da Mehmed Beşe b. İlyas ve Hasan Beşe b. Mehmed ve Hasan Beşe b. Mustafa nâm râciller meclis-i şer‘a li ecli’ş-şehâde hâzırûn olup istişhâd olunduklarında her biri şehâdet edip fi’l-hakīka medîne-i Gelibolu kazâsına tâbi‘ Behram-ı Kebîr nâm karyede sâkin iken vefât eden el-Hâc Osman Beşe b. Abdullah’ın sulbiye sagīre kızı Fâtıma’ya vasî lâzım gelmeğin bin elli dokuz Muharreminde medîne-i mezbûrede kassâm-ı askerî olan Mevlânâ Derviş Mehmed Efendi b. ( ) sagīre-i mezbûre Fâtıma’nın tesviye-i cemî‘-i umûruna işbu Ali Çelebi’yi bizim huzûrumuzda vasî nasb ve ta‘yîn eyledi. İşbu Ali Çelebi dahi vesâyet-i mezbûreyi kabûl edip vasî olmağla müteveffâ-yı mezbûrun terekesinden olup işbu el-Hâc Mehmed yedinde vedî‘a olan işbu hâzır bi’l-meclis eşyâyı işbu vasî Ali Çelebi’ye teslîmi vâcibdir. Biz bu husûsa şâhidleriz şehâdet dahi ederiz deyû her biri münkir-i mezkûr muvâcehesinde edâ-yı şehâdet-i şer‘iyye eylediklerinde gıbbe ri‘âyeti şerâyiti’l-kabûl şehâdetleri makbûle oldukdan sonra şehâdet-i mezbûre mûcebince mezkûr Ali Çelebi sıhhat ve vesâyet-i mezkûre hasebiyle eşyâ-yı mezkûreyi vasiyy-i merkūma teslîmine mezbûr el-Hâc Mehmed mahzarında üzerine dahi şerâyit-i hükm-i [47a] şer‘î müdde‘iye olduğu hâlde hükm olundukdan sonra vasiyy-i mezbûr Ali Çelebi meclis-i hükm-i mezkûrda vedî‘a olan nukūdu ve eşyâ-yı mezbûru bi’l-vesâye mezbûr el-Hâc Mehmed yedinde bi aynihâ tamâmen ahz u kabz edicek, mâ hüve’l-vâki‘ bi’t-taleb ketb olundu. Hurrire fi’l-yevmi’s-sâbi‘ ve’l-ışrîn min Rebî‘ilevvel li sene tis‘a ve hamsîn ve elf. Şuhûdü’l-hâl: El-Hâc Yahya b. Süleyman, Mustafa Bey b. Hüseyin, Mahmud Beşe b. Ahmed, Ali Dede b. Hacı, İlyas b. Mehmed, el-Hâc Çelebi? b. Mehmed