Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 191 Hüküm no: 199 Orijinal metin no: [47a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ayşe bt. Ahmed’in eşi Hacı Ahmed b. Ramazan’dan muhâlaa yoluyla boşandığı Mahmiye-i İstanbul’da Haydarhâne mahallesinde sâkine Ayşe bt. Ahmed nâm hâtun meclis-i şer‘-i hatîr-i lâzımü’t-tevkīrde zevci râfi‘ül-kitâb el-Hâc Ahmed b. Ramazan mahzarında tav‘an ikrâr ve i‘tirâf edip mukaddemâ mezbûr el-Hâc Ahmed’in zevcesi ve menkûhası iken beynimizde şikāk ve [bir]birimizden nüşûz ve a‘râz vâki‘ olmağla mezbûrun zimmetinde nikâhım ma‘kūd iki bin cedîd râyic fi’l-vakt akçe mehr-i müeccelim ve nafaka-i iddetim ve me’ûnet-i süknâm üzerine muhâla‘a edip zevciyyete müte‘allik cemî‘ da‘âvâdan birbirimizin zimmetini ibrâ eylediğimizden sonra tekrâr bin akçe mehr-i müeccel ile nefsimi merkūm el-Hâc Ahmed’e tezvîc edip ol dahi tezevvüc eylemişdi. Hâlâ dahi beynimizde şikāk vâki‘ olmağla zimmetinde nikâhım ma‘kūd bin cedîd akçe mehr-i müeccelim ve nafaka-i iddetim ve me’ûnet-i süknâm üzerlerine ve yedimde makbûzu olan on dirhem sîm kuşak ve bir kırmızı ibrişim şal ve hamam silgisi ve bir peştamal üzerine mezbûr el-Hâc Ahmed ile muhâl‘a edip zevciyyete müte‘allika cemî‘ de‘âvâ ve mütâlebâtdan birmirimizin zimmetini ibrâ-i âmm-ı kātı‘ü’n-nizâ‘la ibrâ eyledik dedikde mezbûr el-Hâc Ahmed dahi mezbûre Ayşe ile vech-i meşrûh üzre hul‘ve ibrâ eylediğini vicâhen tasdîk ve tahkīk edicek, mâ hüve’l-vâki‘ bi’t-taleb ketb olundu. Fi’l-yevmi’s-sâlis ve’l-ışrîn min şehri Rebî‘ilâhir li sene tis‘a ve hamsîn ve elf. Şuhûdü’l-hâl: Ahmed Çelebi el-bâkī, Mehmed b. Abdullah, Osman Çelebi b. Mehmed, Yahya Bey b. Zekeriya.