Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 203 Hüküm no: 216 Orijinal metin no: [50b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Süleyman Bey b. Mehmed’in Mustafa Ağa b. Pîrî’de alacağı kalmadığı Vilâyet-i Rumeli’nde vâki‘ Bihlişte kazâsına tâbi‘ Virek? nâm karyeden Süleyman Bey b. Mehmed meclis-i şer‘de umdetü’l-emâcid ve’l-a‘yân Mustafa Ağa b. Pîrî el-müteferrika mahzarında tav‘an ikrâr ve i‘tirâf edip mezbûr Mustafa Ağa zimmetinde altı yüz kırk riyâlî kuruş hakkım olup meblağ-ı mezkûr altı yüz kırk riyâlî kuruşdan altı yüz riyâlî kuruşunu mezbûr Mustafa Ağa yedinden ahz u kabz edip mâ‘adâ da‘vâsından mezbûr Mustafa Ağa’nın zimmetini ibrâ-i âmla ibrâ ve iskāt eyledim. Min ba‘d mezbûr Mustafa Ağa üzerinde bi vechin mine’l-vücûh da‘vâ ve hakkım kalmadı dedikde mukırr-ı mezbûr Süleyman Beyi ikrâr-ı meşrûhunda el-mukarru lehü’l-mezbûr Mustafa Ağa vicâhen tasdîk ve şifâhen tahkīk edicek, mâ hüve’l-vâki‘ bi’t-taleb ketb olundu. Tahrîren fi’l-yevmi’s-sâdis ve’l-ışrîn min Rebî‘ulâhir sene 1059. Şuhûdü’l-hâl: Hacı Ali b. Mehmed, Resûl Halîfe b. Mustafa Müezzin, el-Hâc osman b. Mustafa, Mehmed b. Ali.