Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 205 Hüküm no: 220 Orijinal metin no: [51b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hacı Süleyman b. Karagöz’ün Kastamonu sancağı eski mutasarrıfı Dilaver Paşa b. Abdullah aleyhindeki alacak davasında sulh olduğu Fi’l-asl Trabzon sancağında Of kazâsına tâbi‘ Depe Kovalar? nâm karye sükkânından el-Hâc Süleyman b. Karagöz meclis-i şer‘-i hatîr-i lâzımü’t-tevkīrde ber vech-i arpalık Kastamonu sancağından ma‘zûl olan emîrü’l-ümerâ’i’l-kirâm kebîrü’l-küberâi’l-fihâm zü’l-kadri ve’l-ihtirâm Dilaver Paşa b. Abdullah tarafından ikrâr-ı âti’l-beyânı tasdîka vekîl olup bimâ-hüve nehcü’s-sübût şer‘an sâbite olan işbu râfi‘ül-kitâb Mehmed Ağa b. Fazlullah mahzarında tav‘an ikrâr ve i‘tirâf edip bundan akdem paşa-yı müşârun-ileyh Trabzon eyâletine mutasarrıf olduğu hâlde bana cem‘iyyet sâhibi olup ehl-i fesâdsız, ahz ve habs edip benden nâ hak sekiz yüz kıt‘a riyâlî kuruşumu almış idi. Hâlâ taleb eylediğimde ve vermede ta‘annüd edip inkâr etmekle beynimizde münâza‘ât-ı kesîre, muhâsamât-ı şedîde vâki‘ olmuşidi. El-hâletü hâzihî beynimiz muslihûn tavassut edip beni paşa-yı müşârun-ileyh ile an inkâr yüz riyâlî kuruş üzerine meclis-i akidde müşârun-ileyh bir donluk mâ’î iskarlat çuka ve bir donluk kırmızı frengî atlas ve bir mutallâ? dülbend üzerine inşâ-i akd-i sulh eylediklerinde ben dahi sulh-ı mezbûru kabûl ve bedel-i sulh olan meblağ-ı mezbûr yüz riyâlî kuruşu ve zikr olunan bir donluk mâ’î iskarlat çuka ve bir donluk kırmızı Frenk atlas ve mutallâ dülbendi meclis-i sulhda paşa-yı müşârun-ileyh yedinden bi’t-tamâm ve’l-kemâl ahz u kabz edip meblağ-ı mezbûr sekiz yüz kıt‘a riyâlî kuruş da‘vâsından berâtı olup paşa-yı müşârun-ileyhin zimmetini ibrâ-i âmm-ı kātı‘ü’n-nizâ‘la ibrâ ve iskāt eyledim. bi vechin mine’l-[vücûh] ve sebebin mine’l-esbâb da‘vâ ve hakkım kalmadı dedikde, mukırr-ı mezbûrun vech-i minvâl üzre cârî olan ikrârını vekîl-i merkūm vicâhen tasdîk ve şifâhen tahkīk edicek, mâ hüve’l-vâki‘ bi’t-taleb ketb olundu. Fi’l-yevmi’l-hâdî ve’l-ışrîn min şehri Rebî‘ulâhir li sene tis‘a ve hamsîn ve elf. Şuhûdü’l-hâl: Halil Ağa b. Ali, Ömer Beşe b. Mustafa, Osman Beşe b. Yusuf, Numan Beşe b. Sinan, Osman b. Mehmed.