Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 206 Hüküm no: 221 Orijinal metin no: [51b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Vişko? bt. Zülfikar’ın boşandığı eşi Süleyman b. Mehmed’de alacağı kalmadığı Vilâyet-i Rumeli’nde Piremedi kazâsına tâbi‘ Kadoviç? nâm karyeden Veşko bt. Zülfikār nâm hâtun tarafından husûs-ı âti’l-beyâna vekîl olup vekâleti mezbûreyi ma‘rifet-i şer‘iyye ile ârifîn olan Hasan b. Ahmed ve Mehmed Beşe b. Ahmed şehâdetleriyle şer‘an sâbite olan Sinan Beşe b. Mehmed meclis-i şer‘-i hatîr-i lâzımü’t-tevkīrde müvekkile-i mezbûrenin zevc-i mutallıkı işbu Süleyman b. Mehmed mahzarında bi’l-vekâle ikrâr ve i‘tirâf edip merkūm Süleyman müvekkilem mezbûrenin zevci olup hâlâ talâk-ı bâyin ile tatlîk eyledikde zimmetinde mütekarrir olup nikâhı ma‘kūd hakkı olan bin altı yüz fıddî râyic fi’l-vakt akçe mehr-i müeccelini bi hükmi’l-vekâle merkūm Süleyman’dan taleb eylediğimde meblağ-ı mezbûreyi bin yüz akçesini vekâletim hasebiyle merkūme Süleyman yedinden ahz u kabz edip meblağ-ı bâkī beşyüz akçeden berî olup merkūm Süleyman’ın zimmetini bi hükmi’l-vekâle ibrâ-i âmm-ı kātı‘ü’n-nizâ‘la ibrâ ve iskāt eyledim dedikde, vekîl-i mezbûrun minvâl-i muharrer üzre cârî ve sâdır olan ikrârını el-mukarru lehü’l-merkūm vicâhen tasdîk ve şifâhen tahkīk edicek, mâ hüve’l-vâki‘ bi’t-taleb ketb olundu. Tahrîren fi’l-yevmi’l-hâmisi’l-ışrîn min şehri Rebî‘ulâhir li sene tis‘a ve hamsîn ve elf. Şuhûdü’l-hâl: Sinan Beşe b. Ali, Hasan Beşe b. Ali, Hüseyin b. Kurd, Ali b. Mehmed, Mehmed b. Mehmed.