Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 222 Hüküm no: 241 Orijinal metin no: [56b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ayşe bt. Mustafa’nın boşandığı eşi Seyyid Mustafa Çelebi’de olan alacağına Seyyid Mahmud b. Himmet’in kefil olduğu Mahrûse-i Galata muzâfâtından Tophâne’de vâki‘ Mustafa Ağa mahallesinde sâkine Ayşe Hâtun bt. Mustafa meclis-i şer‘-i şerîfde zevc-i mutallıkı işbu râfi‘ül-kitâb es-Seyyid Mustafa Çelebi b. es-Seyyid Mehmed mahzarında tav‘an ikrâr ve i‘tirâf edip mezbûr es-Seyyid Mustafa Çelebi sâbıkā zevcim olduğu hâlde zimmetinde nikâhım ma‘kūd elli bin cedîd râyic fi’l-vakt akçe mehr-i müeccelim olup ve cihet-i karz-ı şer‘îden dahi bin dört yüz riyâlî kuruş hakkım olmağın meblağayn-i mezbûreyni merkūm es-Seyyid Mustafa Çelebi’den da‘vâ ve taleb eylediğimde zimmetinde ma‘kūd olan elli bin cedîd akçe mehr-i müeccel hakkımı ikrâr edip cihet-i karz-ı mezbûrdan olan bin dört yüz riyâlî aded hakkımı inkâr etmekle beynimizde muslihîn tavassut edip ikrâr eylediği elli bin cedîd akçe mehr-i müeccel hakkım da‘vâsından beni mezbûr es-Seyyid Mustafa Çelebi ile dokuz bin altı yüz akçe üzerine inşâ-i akd-i sulh eylediklerinde ben dahi sulh-ı mezbûru kabûl edip bedel-i sulh olan meblağ-ı mezbûru târih-i kitâbdan yirmi gün tamâmına değin te’cîl edip ol dahi ecel-i merkūmu kabûl eyledikden sonra mehr-i mezbûr elli bin akçe da‘vâsından ve karzından olan bin dört yüz riyâlî kuruş da‘vâsından merkūm es-Seyyid Mustafa Çelebi’nin zimmetini ibrâ-i âmm-ı kātı‘ü’n-nizâ‘la ibrâ eyledim dedikde, gıbbe’t-tasdîki’ş-şer‘î müdde‘iye Üsküdar’da Evliyâ mahallesinde sâkin es-Seyyid Mahmud b. Himmet, bedel-i merkūma tarafeynden emr ve kabûlü hâviye kefâletiyle kefîl oldukdan sonra mezbûr es-Seyyid Mustafa’nın oğulları Seyyid Mahmud ve Seyyid Ahmed’den her biri dahi kefîl-i mezbûrun bi hükmi’l-kefâle zimmetine lâzım gelen meblağa kefîl olmağın mâ vaka‘a bi’t-taleb ketb olundu. Fi’l-yevmi’s-sâmin ve’l-ışrîn min şehri Rebî‘ulâhir li sene tis‘a ve hamsîn ve elf. Şuhûdü’l-hâl: Abdünnebi b. Ahmed, Şeyh Ahmed b. Ali, Yusuf b. Mustafa, Seyyid Mahmud Çavuş b. Hasan, es-Seyyid Ali Efendi.