Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 221 Hüküm no: 240 Orijinal metin no: [56b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Murad Ağa Vakfı’na borcu olan Ahmed Çelebi’nin Mehmed Çelebi’de olan alacağını borcuna havâle ettiğinin anlaşıldığı Mahmiye-i İstanbul’da Murad Ağa Vakfına meşrûtiyyet üzre bi’l-fi‘l mütevellî olan Hacı Ahmed Efendi b. el-Hâc Hasan Efendi meclis-i şer‘-i hatîrde mahmiye-i mezbûrede Çırakçı Hamza mahallesinde Mehmed Çelebi b. Ramazan mahzarında üzerine takrîr-i da‘vâ edip mahrûsa-i Galata hâricinde kasaba-i Kasımpaşa’da taht-ı Tahtaminâre mahallesinde sâkin işbu hâzır bi’l-meclis Ahmed Çelebi b. Mehmed zimmetinde mütevellîsi olduğum Murad Ağa Vakfı malından üç bin fıddî cedîd râyic fi’l-vakt akçe deyn olup işbu Ahmed Çelebi’nin dahi işbu Mehmed Çelebi zimmetinde cihet-i deyn-i şer‘îden üç bin mezbûrü’n-nakit akçe hakkı olmağla işbu Ahmed Çelebi işbu Mehmed Çelebi üzerine hakkı olan üç bin akçeye taraf-ı vakf-ı mezbûra deyn olan meblağ-ı mezbûr üç bin akçe ile beni havâle-i sahîha-i şer‘iyye ile havâle eyledikde ben dahi cümlemizin rızâsıyla havâle-i mezkûreyi kabûl eylemekle işbu Mehmed Çelebi merâfık-ı vakf-ı mezkûr bi hükmi’l-kefâle medyûn olmağın meblağ-ı muhalli işbu Mehmed Çelebi bi’t-tevliye elyediğimde edâdan ta‘annüd eder. Suâl olunup alıverilmesi matlûbumdur dedikde, gıbbe’s-suâl mezkûr Mehmed Çelebi cevâbında vech-i muharrer üzre havâle olup cihet-i havâle-i mezkûrede vakf-ı mezkûra zimmetinde üç bin akçe edâsı vâcib deyni olduğunu tav‘an ikrâr edicek, ikrârı mûcebince meblağ-ı mezkûr üç bin akçenin mütevellî-i vakf-ı mezbûra edâ ile mezbûr Mehmed Çelebi üzerine ilzâm olunup mâ hüve’l-vâki‘ bi’t-taleb ketb olundu. Fî gurreti Cumâdelûlâ li sene tis‘a ve hamsîn ve elf. Şuhûdü’l-hâl: Ömer Beşe b. Ramazan, el-Hâc Abdurrahman Çelebi b. el-Hâc Hasan Efendi, el-Hâc Ömer Çelebi b. Hüseyin, Mustafa Ağa b. Yusuf.