Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 223 Hüküm no: 243 Orijinal metin no: [57a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa Ağa b. Yusuf’un evini, Köse Hüseyin’in küçük çocukları Mehmed Kaya? ve Sakine’ye istiğlâl suretiyle sattığı Mahmiye-i İstanbul’da sâbıkā Nişancı Paşa-yı Atîk mahallesinde olup hâlâ Tercüman Yunus mahallesi ahâlîsinden Mustafa Ağa b. Yusuf meclis-i şer‘-i hatîrde mahmiye-i mezbûrede ( ) mahallesinde sâkin iken bundan akdem vefât eden Köse Hüseyin Efendi’nin sulbî sagīr oğlu Mehmed Gıyas’ın sulbiye sagīr[e] kızı Sakine’nin tesviye-i umûruna kıbel-i şer‘-i enverden mansûb vasîleri olan Hacı Ahmed Bey b. Abdullah tarafından ikrâr-ı âti’l-beyânı tasdîka vekîl olup vekâleti bimâ-hüve nehcü’s-sübût şer‘an sâbite olan Hacı Ömer Çelebi b. Hüseyin mahzarında tav‘an ikrâr ve i‘tirâf edip zikri âtî akdin sudûruna değin yedimde ve taht-ı tasarrufumda mülk ve hakkım olup zikr olunan Tercüman Yunus mahallesinde vâki‘ bir tarafı ba‘zan Kurd Çavuş b. ( ) veresesi mülküne ve iki tarafı tarîk-i âmma müntehî cemî‘ menzilimi kâffe-i hukūk ve merâfıkı ile vasiyy-i mezkûr Hacı Ahmed Bey’e altı yüz riyâlî kuruşa bi tarîki âmme li cemî‘i’l-istiğlâl bey‘ ve teslîm eyledim. Ol dahi sagīrân-ı mezkûrân malları ile sagīrân-ı merkūmân için vech-i meşrûh üzre bi’l-vesâye iştirâ ve teslîm edip semen-i mezkûr altı yüz riyâlî kuruşu vasiyy-i mezbûr yedinden tamâmen ahz u kabz ve istîfâ eylediğimden sonra vasiyy-i mezkûr cemî‘ menzil-i mezkûru ba‘de’t-tahliyeti’ş-şer‘iyye târih-i kitâbdan bir sene tamâmına değin bana altmış riyâlî kuruşa îcâb ve teslîm edip ben dahi vech-i muharrer üzre istîcâr ve tesellüm eyledim dedikde, mukırr-ı mezbûru ikrâr-ı meşrûhunda vekîl-i mezkûr vicâhen tasdîk ve şifâhen tahkīk edicek, mâ hüve’l-vâki‘ bi’t-taleb ketb olundu. Fi’l-yevmi’s-sânî min Cumâdelûlâ sene 1059. Şuhûdü’l-hâl: Es-Seyyid Mehmed Efendi el-Hatîb, Mustafa Ali b. Ali Efendi, el-Hâc Abdurrahman Çelebi b. ( ).