Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 224 Hüküm no: 244 Orijinal metin no: [57a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Niko v. Dimitri’nin Kerpiniş’teki bağını Kiryazi v. Petro’ya sattığı Vilâyet-i [Rum]elinde nefs-i Kerpiniş ahâlîsinden Nikola v. Dimitri nâm bakkal zimmî meclis-i şer‘-i hatîr-i lâzımü’t-tevkīrde yine Kerpiniş kazâsına tâbi‘ Zaltana nâm karyeden Kiryazi v. Petro nâm bakkal muvâcehesinde tav‘an ikrâr ve i‘tirâf edip zikr-i âtî akdin sudûruna değin yedimde ve taht-ı tasarrufumda mülk ve hakkım olup Kerpiniş bağları hilâlinde vâki‘ bir tarafı Danyal v. Komono bağına ve bir tarafı Nikola v. Çuka bağına ve iki tarafı tarîk-i âmma müntehî bir dönüm cemî‘ bağımı kâffe-i hukūkuyla mezbûr Kiryazi’ye üç bin fıddî râyic fi’l-vakt akçeye tarafeynden îcâb ve kabûlü hâvî şürût-ı müfsideden ârî bey‘-i bâtla bey‘ eyledim. Ol dahi iştirâ eyleyip semen-i mezkûru üç bin sekiz yüz akçeye bana def‘ ve teslîm eyleyip ben dahi yedinden tamâmen ahz u kabz eyledim. Zikr olunan bağı mahallinde kabza mezbûr Kiryazi’yi taslît eyledim. Min ba‘d cemî‘ bağ-ı mezkûr mezbûr Kiryazi’nin mülk ve hakkıdır dedikde mukırr-ı mezbûru vech-i minvâl-i muharrer üzre cârî ve sâdır olan ikrârını el-mukırru lehü’l-mezbûr vicâhen tasdîk ve şifâhen tahkīk edicek, mâ vaka‘a bi’t-taleb ketb olundu. Hurrire fi’l-yevmi’s-sânî ve’l-ışrîn min şehri Rebî‘ulâhir li sene tis‘a ve hamsîn ve elf. Şuhûdü’l-hâl: Nikola [v.] Şir, Yorgi v. Yani, Dağa? v. Yorgi, Yani v. Niko.