Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 225 Hüküm no: 246 Orijinal metin no: [57b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ahmed Çelebi b. İlyas’ın, murisi Hacı İbrahim b. İlyas’ın terekesine ait bazı eşyaları Zağra-i Atîk kadısı Ahmed Efendi’den teslim aldığı Vilâyet-i Rumeli’nde Zağra-i Atîk kasabasında sâkin iken vefât eden el-Hâc İbrahim b. İlyas’ın li ebeveyn er karındaşı ve vârisi Ahmed Çelebi meclis-i şer‘-i hatîrde kasaba-i mezbûre kadısı olan umdetü kuzâti’l-islâm Ahmed Efendi b. ( ) tarafından ikrâr-ı âti’l-beyânı tasdîka vekîl olup bimâ-hüve nehcü’s-sübût şer‘an vekâleti sâbite olan Hamza Beşe b. Mustafa mahzarında bi’t-tav‘i’s-sâf ikrâr ve i‘tirâf mûrisim müteveffâ-yı mezbûrun terekesinden olup bi hasebi irsi’ş-şer‘î bana isâbet ve intikāl edip müvekkil-i mûmâ-ileyh yedinde mazbût olan eşyâsından bir re’s kabanını? ve bir mor iskarlat merdâne ferâceye kaplı tilki nâfe kürkünü ve bir sîm devâtını müvekkil-i müşârun-ileyh yedinden ahz u kabz eylediğimden mâ‘adâ yine mûrisim müteveffâ-yı merkūmun terekesinden bir mâ’î iskarlat merdâne çuka ferâcesini ve bir yeşil iskarlat çuka ferâcesini ve bir benefşe iskarlat merdâne çuka ferâceye kaplı sincap kürkünü ve bir yeşil kemha merdâne kaftanını, on sekiz aded sîm düğmesiyle ve bir yeşil dârâyî kaftanını ve bir mor iskarlat çuka çakşırını ve iki sîm bıçağını ve bir sîm savaye? kuşağını ve bir beyaz ipek kuşağını ve iki müsta‘mel keten bezi merdâne gömleğini ve iki müsta‘mel keten bezi merdâne donunu ve iki münakkaş uçkurunu ve üç münakkaş makramasını ve iki sırmalı cüzdanını ve bir en‘âm-ı şerîfini ve bir cöngünü ve bir yan kuşağını ve bir köhne kırmızı zıbınını ve bir sepet sandığını vekîl-i mezbûr Hamza Beşe yedinden bi hükmi’l-verâse ahz u kabz eyledim dedikde, mukırr-ı mezbûru ikrâr-ı meşrûhunda vekîl-i mezbûr vicâhen tasdîk ve şifâhen tahkīk edicek, mâ hüve’l-vâki‘ bi’t-taleb ketb olundu. Fi’l-yevmi’l-hâmis ve’l-ışrîn min şehri Rebî‘ulâhir li sene tis‘a ve hamsîn ve elf. Şuhûdü’l-hâl: Ahmed Çelebi b. Abdurrahman, İskender Bey b. Şaban, Ahmed Çelebi b. Abdülbâkī Efendi, Yahya b. Zekeriya, İsmail Çelebi b. Yunus.