Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 225 Hüküm no: 247 Orijinal metin no: [57b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Esirci İbrahim b. Abdullah’ın alacak davasında şahid gösterdiği Zülfikar Reis’in şahitliğinin kabul edilmediği Mahrûse-i Galata muzâfâtından kasaba-i Beşiktaş’da Sinan Paşa mahallesinde sâkin Esirci İbrahim b. Abdullah meclis-i şer‘-i hatîr-i lâzımü’t-tevkīrde Dadyan keferesi elçisinin tercümanı olan Bijan v. Varzel? mahzarında üzerine takrîr-i da‘vâ edip mezbûr Bijan zimmetinde cihet-i karz-ı şer‘îden yedi yüz elli riyâlî kuruş hakkım vardır. Suâl olunup meblağ-ı mezbûrun alıverilmesin taleb ederim dedikde, gıbbe’s-suâl akībe’l-inkâr müdde‘âsını mübeyyin beyyine taleb olundukda, mahrûsa-i mezbûre ağalarından Tophânede Defterdâr mahallesinde sâkin Zülfikār Reis b. Abdullah ve Ebü’l-fazl mahallesinde sâkin olup mahrûsa-i mezbûrede debbâğ olan Mustafa b. derviş nâm kimesneler li ecli’ş-şehâde meclis-i şer‘a hâzırân olup gıbbe’l-istişhâd her biri şehâdet edip fi’l-vâki‘ işbu müdde‘î Esirci İbrahim işbu Bijan zimmetinde edâsı vâcib cihet-i karz-ı şer‘îden yedi yüz elli riyâlî kuruş-ı kebîr hakkı vardır. Biz bu husûsa bu vech üzre şâhidler, şehâdet dahi ederiz deyû edâ-yı şehâdet-i şer‘iyye eylediklerinden sonra hâl şâhidân-ı mezbûrân istikşâf olundukda mezbûr Zülfikār Reis’in keyf-i hâline kemâl-i vukūfları olup mahmiye-i İstanbul’da Odunkapısı kundakçılarından Kasab Timurhan mahallesinde sâkin Hüseyin Beşe b. Abdullah ve Siyavuş Bey b. Abdullah ve Uzun Hüseyin Ağa menzilinde sâkin Rıdvan b. Abdullah nâm kimesnelerden sırren istihbâr olundukda mezbûrlardan her biri merkūm Zülfikār Reis iyi âdem değildir, kâziben şehâdetden ictinâbı yokdur, her vechile sû-i hâline muttali‘iz deyû şehâdet eylediklerinden, şehâdetleri mûcebince mezbûr Zülfikār Reis’in şehâdetden red olunup mâ hüve’l-vâki‘ bi’t-taleb ketb olundu. Fi’l-yevmi’s-sâlis min şehri Rebî‘ulâhir li sene tis‘a ve hamsîn ve elf. Şuhûdü’l-hâl: Ahmed Çelebi b. Abdülbâkī, Osman Çelebi b. Mehmed, Yahya Bey b. Zekeriya, İsa b. Ahmed.