Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 236 Hüküm no: 256 Orijinal metin no: [61a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa Efendi b. İsmail Ağa’nın vârislerinin, köle Hasan b. Abdullah’ı âzat ettikleri Mahmiye-i İstanbu[l’da] Muhtesib Karagöz mahallesinde sâkin olup mahmiye-i mezbûrede Kadırga Limanı’nda vâki‘ Mehmed Paşa Medresesi olduğu hâlde vefât eden Mustafa Efendi b. İsmail Ağa’nın verâseti vâlidesi Fâtıma Hâtun bt. el-merhûm Hoca Mustafa Efendi’ye ve zevce-i metrûkesi Afrasyab Hâtun bt. Abdullah’a ve sulbiye kebîre kızları Emetullah Kadın ve Rukiye Kadın’a ve li ebeveyn kız karındaşı Ayşe Hâtun’a münhasıra olduğu şer‘an sâbit oldukdan sonra mezbûrât Fâtıma ve Afrasyab Hâtun ve Emetullah Kadın ve Rukiye Kadın ve Ayşe Hâtun taraflarından i‘tâk-ı âti’l-beyânı ikrâra vekîl olup mezbûrâtı ma‘rifet-i şer‘iyye ile ârifân olan Mehmed Efendi b. Bünyad ve Mehmed Çelebi b. Piyâle nâm kimesneler şehâdetleriyle vekâleti sâbite olan Hüseyin Efendi b. Mustafa meclis-i şer‘-i hatîr-i lâzımü’t-tevkīrde rıkkını mu‘terif olan işbu râfi‘ül-kitâb orta boylu açık kaşlı gök elâ gözlü kumral sakallı Rûsiyyetü’l-asl müslimetü’l-mille yüzünde eser-i cerh olan Hasan b. Abdullah nâm abd mahzarında tav‘an bi’l-vekâle ikrâr ve i‘tirâf edip mezbûr Hasan müteveffâ-yı mezbûr Mustafa Efendi’nin abd-i memlûku olup ba‘de vefât irs-i şer‘î ile müvekkilelerim mezbûrân Fâtıma Hâtun ve Afrasyab Hâtun ve Emetullah Kadın ve Rukiye Kadın ve Ayşe Hâtun’a intikāl etmeğin her biri ma‘an mülk-i mevrûsları olan abd-i mezbûr Hasan’ı hasbeten lillâhi’l-ale’l-azîm ve taleben li merzâti’r-Rabbi’r-rahîm tahrîr ve i‘tâk eyledi. Ba‘de’l-yevm mezbûr Hasan sâyir ahrâr-ı asliyyîn gibi hür olup üzerinde müvekkilelerimin hakk-ı velâdan gayrı hakları bâkī kalmamışdır dedikde, mâ hüve’l-vâki‘ bi’t-taleb ketb olundu. Fî gurre-i Cumâdelûlâ li sene tis‘a ve hamsîn ve elf. Mustafa Çavuş b. Mehmed, Abdülkerim Çelebi b. Yahya el-müezzin, Osman Çelebi b. Mehmed, Abdülganî Efendi b. Mehmed, Rıdvan [b.] Şaban.