Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 235 Hüküm no: 255 Orijinal metin no: [61a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Saliha bt. Rıdvan’ın boşandığı eşi Ahmed Efendi b. Mahmud’dan mehrini tahsil ettiği Mahmiye-i İstanbul’da Topkapısı dâhilinde Kürkçübaşı mahallesinde sâkine Saliha bt. Rıdvan Bey nâm hâtunun li ebeveyn karındaşı ve husûs-ı âti’l-beyânda vekîli olup vekâleti bimâ-hüve nehcü’s-sübût şer‘an sâbite olan ( ) Bey meclis-i şer‘-i hatîrde zevc-i mutallıkı olan işbu sâhibü’l-kitâb fahrü’l-müderrisîni’l-kirâm Ahmed Efendi b. Mahmud Efendi mahzarında tav‘an bi’l-vekâle ikrâr ve i‘tirâf edip müvekkilem mezbûre Saliha Hâtun mezbûr Ahmed Efendi’nin zevce-i menkûhası ve helâli olup bundan akdem talâk-ı bâyin ile mezbûre Saliha’yı ba‘de’l-ahz ve kabûl Ahmed Efendi tatlîk eyledikde nikâhı ma‘kūd üç bin altı yüz fıddî cedîd râyic fi’l-vakt akçe hakkı mezbûr ahmed Efendi zimmetinde iken yine mezbûr Ahmed Efendi müvekkilem mezbûreyi bin dört yüz mezbûru’n-nakit akçe üzerine akd-i cedîd ile tezevvüc eyleyip yine bâyin-i talâkla tatlîk eyledikde mehr-i mezkûru cem‘an beş bin akçeyi müvekkilem mezbûre merkūm Ahmed Efendi’den taleb eylediğimde mezbûr Ahmed Efendi mehr-i evvel ancak bin beşyüz akçedir ve mehr-i sânî dahi ancak beş yüz akçedir bu cihetle zimmetimde iki mehir iki bin akçedir deyû cevâb vericek ikrâr-ı mezbûr üzre meblağ-ı mukırr-ı iki bin akçeyi müvekkilem mezbûre taleb edip ben tarafından kabza vekîl olmağla meblağ-ı mukırrûn leh iki bin akçeyi merkūm Ahmed Efendi bana def‘ ve tesellüm edip ben dahi yedinden tamâmen ahz u kabz ve istîfâ eyledim dedikde, mukırr-ı mezbûru bi’l-vekâle cârî olan ikrârında el-mukırrûn lehü’l-mezbûr ahmed Efendi vicâhen tasdîk ve şifâhen tahkīk edicek, mâ hüve’l-vâki‘ bi’t-taleb ketb olundu. Fi’l-yevmi’s-sâdis ve’l-ışrîn min şehri Rebî‘ulâhir li sene tis‘a ve hamsîn ve elf. Şuhûdü’l-hâl: Ali Çelebi b. Sadık, Mustafa Bey b. Mehmed, Mustafa Beşe b. İvaz, Ahmed Çelebi b. Abdülkerim.