Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 237 Hüküm no: 258 Orijinal metin no: [61b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Tüccar Bogos v. Çargam’ın Marhaş v. Dilek’te alacağı kalmadığı Tüccâr tâifesinden Bogos v. Çargam nâm Ermeni meclis-i şer‘-i hatîr-i lâzımü’t-tevkīrde yine tüccâr tâifesinden râfi‘ü’l-vesîka Kakas [Marhaş] v. Dilek? nâ[m] Ermeni muvâcehesinde tav‘an ikrâr ve i‘tirâf edip mezbûr Marhaş Zimmetinde cihet-i karz-ı şer‘îden altmış kıt‘a riyâlî kuruş hakkım olup meblağ-ı mezbûr altmış riyâlî kuruşu mahmiye-i İstanbul’da Mahmud Paşa mahkemesinde bundan akdem da‘vâ ve isbât edip ba‘de’l-hükmi’ş-şer‘î hâlâ meblağ-ı mezkûr altmış riyâlî kuruşu mezbûr Marhaş yedinden tamâmen ahz u kabz ve istîfâ eyledim. Min ba‘d meblağ-ı mezkûra müte‘allik mezbûr Marhaş üzerine da‘vâ ve hakkım kalmamışdı dedikde, mukırr-ı mezbûr Çargam’ı ikrâr-ı meşrûhunda el-mukırrûn lehü’l-mezbûr Marhaş vicâhen tasdîk ve şifâhen tahkīk edicek, mâ hüve’l-vâki‘ bi’t-taleb ketb olundu. Fi’l-yevmi’s-sâlis min Cumâdelûlâ li sene tis‘a ve hamsîn ve elf. Şuhûdü’l-hâl: Ali Çelebi b. el-Hâc Mehmed, İsa Bey b. Ahmed, İbrahim Efendi el-mukayyid, Yusuf v. Margar, Ohannes v. Dilek.