Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 239 Hüküm no: 261 Orijinal metin no: [62a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ali Bey b. Sinan’ın kefaletten olan borcunu Hacı Ömer b. Ahmed’in vârislerine ödemesine karar verildiği Mahmiye-i İstanbul’da Çâşnigir mahallesinde sâkin iken bundan akdem vefât eden el-Hâc Ömer b. Ahmed’in zevce-i metrûkesi ve verâsesi Râbia Hâtun bt. Süleyman asâleten ve müteveffâ-yı mezbûrun sulbiye sagīre kızları işbu hâzır bi’l-meclis Ayşe ve Fâtıma’nın kıbel-i şer‘-i enverden mansûbe vasîleri Mülayim bt. Abdullah vesâyeten meclis-i şer‘-i hatîrde mahmiye-i mezbûrede Kazgancı Sa‘di mahallesinde sâkin Ali Bey b. Sinan mahzarında üzerine her biri takrîr-i da‘vâ edip mûrisimiz müteveffâ-yı mezbûrun işbu Ali Bey zimmetinde emti‘a-i mütenevvi‘a semeninden iki yüz yirmi riyâlî kuruş olduğundan gayrı mezbûr Ali Bey tüccâr tâifesinden gāib ani’l-meclis Hacı oğlu el-Hâc yedinden iki yüz yirmi yedi riyâlî kuruş istidâne eyledikde mûrisimiz müteveffâ-yı mezbûr meblağ-ı mezbûr mezkûr Ali Bey emri ve dâyin-i mezkûr kabûl ile kefâlet-i sahîha-i şer‘iyye ile kefîl oldukdan sonra mekfûlün-bih iki yüz yirmi yedi riyâlî kuruşu ba‘de’l-mütâla‘a mûrisimiz merkūm el-Hâc Ömer dâyin-i mezbûr el-Hâc Mehmed’e bi hükmi’l-kefâle edâ eyledikden sonra işbu Ali Bey’e mürâca‘at hilâlinde iken vefât edip semen-i mezbûr iki yüz yirmi riyâlî kuruş ve cihet-i kefâletinden eylediği iki yüz yirmi yedi riyâlî kuruş cem‘an dört yüz kırk yedi riyâlî kuruş işbu Ali Bey zimmetinde kalıp bi hükmi’l-verâse bana ve sagīrân-ı merkūmetâna isâbet ve intikāl etmekle suâl olunup asâlet ve vesâyetim hasebiyle alıverilmesin taleb ederim dediklerinde, gıbbe’s-suâl merkūm Ali Bey cevâbında fi’l-hakīka benim gāib ani’l-meclis el-Hâc Veli nâm kimesneye iki yüz yirmi riyâlî kuruş deynim olmağla müteveffâ-yı mezbûr el-Hâc Ömer’den iki yüz yirmi riyâlî kuruşluk emti‘a-i mütenevvi‘a iştirâ ve ahz edip merkūm el-Hâc Veli’ye deynim olmağla [mukā]belesinde teslîm etmekle meblağ-ı mezbûr iki yüz yirmi riyâlî zimmetimde merkūm el-Hâc Ömer’e deyn olduğundan gayrı mezbûr el-Hâc Mehmed yedinden istidâne ve kabz eylediğim iki yüz yirmi yedi riyâlî kuruşu dahi merkūm Hacı Ömer tarafından ve kabûlü hâviye kefâlet-i sahîha-i şer‘iyye ile kefîl olmağla mekfûlün-bih iki yüz yirmi yedi riyâlî kuruşu dahi bi hükmi’l-kefâle dâyinim mezbûr el-Hâc Mehmed’e edâ ve teslîm etmekle bi hükmi’l-kefâle edâ eylediği iki yüz yirmi yedi riyâlî kuruş dahi zimmetinde deyn-i müctemi‘ oldukdan sonra târih-i kitâba gelince dört senedir meblağ-ı mezbûr dört yüz kırk yedi riyâlî kuruşu deyn mahmiye-i mezbûrede mezbûr el-Hâc Ömer’e ticâret eylediği yağlıkçı sokağında hâl-i hayât ve nefâz-ı tasarrufâtında bi’t-tamâm vaz‘ ve teslîm eyledim ol dahi minvâl-i muharrer üzre yedimden tamâmen ahz ve istîfâ etmekle meblağ-ı mezbûr Ali Bey’in sâdır [olan] def‘-i meşrûhunu mübeyyin beyyine taleb olundukda ityân-ı beyyine için istimhâl etmekle mihel-i şer‘î ile imhâl olunup ikāmet-i beyyineden âciz olup yine istimhâl edip selâse merrât imhâl ve adem-i ityân-ı beyyine izhâr-ı acz edip yemîn istimhâl eyledikde kavline iltifât olunmayıp gıbbe’l-istihlâf zevce-i mezbûre Râbia Hâtun’a minvâl-i muharrer üzre meblağ-ı mezbûr dört yüz kırk yedi riyâlî kuruşu merkūm Ali Bey’in yedinden müteveffâ-yı merkūm Hacı Ömer hâl-i hayâtında asâleten veya vekâleten ahz u kabz eylediğine veyâhud turuk-ı şer‘iyyeden bi târik ile mezbûrun zimmetini ibrâ ve iskāt eylediğini bilmediğine yemîn teklîf olundukda ol dahi hasebi’s-suâl yemîn billâhi’l-aliyyi’l-azîm edicek, vasîye şer‘an yemîn billâh teveccüh etmeyip ikrâr-ı meşrûhunu mûcebince meblağ-ı müdde‘â dört yüz kırk yedi riyâlî kuruşun üzerine merkūmeye edâsına merkūm Ali Bey’in üzerine hükm-i şer‘î ile hükm olunup mâ vaka‘a bi’t-taleb ketb olundu. Fi’l-yevmi’t-tâsi‘ ve’l-ışrîn min şehri Rebî‘ulâhir li sene tis‘a ve hamsîn ve elf. Şuhûdü’l-hâl: Ahmed Çavuş b. Ali, el-Hâc Mehmed b. Veli, Davud Bey b. Hızır, el-Hâc İlyas b. Nasuh, Mustafa Efendi b. Ahmed Efendi, Mustafa Ağa b. ( ).