Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 240 Hüküm no: 262 Orijinal metin no: [62b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ahmed Ağa b. Mehmed’in çayırlığının tasarruf hakkını Ömer Beşe b. Mehmed’e devrettiği Vilâyet-i Rumeli’nde İstarva kazâsına tâbi‘ Dolan nâm karyeden Ahmed Ağa b. Mehmed el-müteferrika meclis-i şer‘-i hatîrde karye-i mezbûreden işbu râfi‘ü’l-vesîka Ömer Beşe b. Mehmed mahzarında tav‘an ikrâr ve i‘tirâf edip zikr-i âtî tefevvüzün sudûruna değin yedimde ve taht-ı tasarrufumda muntazam hakk-ı müfevvezim olup karye-i mezbûrede vâki‘ bir tarafı tarîk-i âmma ve bir tarafı Ömer Beşe b. ( ) çayırına ve bir tarafı Mustafa Beşe b. Mehmed tarlasına ve bir tarafı Mehmed ve Mustafa ibney Pervâne bostanına muttasıl bir kıt‘a cemî‘ çayırı kâffe-i hukūkuyla mezbûr Ömer Beşe’ye sekiz yüz riyâlî fıddî râyic fi’l-vakt akçeye sâhib-i arz ma‘rifetiyle ferâğ ve tefvîz eyledim. Ol dahi tefevvüz ve kabûl edip mukābele-i ferâğ olan meblağ-ı mezbûr sekiz yüz elli akçeyi bana def‘ ve teslîm edip ben dahi yedinden tamâmen ahz u kabz ve istîfâ eyledim. Min ba‘d zikr olunan cemî‘ çayır mezbûr Ömer Beşe’yi taslît eyledim dedikde, mukırr-ı mezbûr Ahmed Ağa’yı ikrâr-ı meşrûhunda el-mukırrûn lehü’l-mezbûr vicâhen tasdîk ve şifâhen tahkīk edicek, mâ hüve’l-vâki‘ bi’t-taleb ketb olundu. Fi’l-yevmi’s-sâlis min Cumâdelûlâ li sene tis‘a ve hamsîn ve elf. Şuhûdü’l-hâl: Ali Bey b. Ahmed Bey, Koç Mehmed Bey b. Hasan, Ali b. Süleyman, Mehmed b. Pervâne, Ahmed Bey, İsa Bey [b.] Ahmed.