Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 245 Hüküm no: 268 Orijinal metin no: [64a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Temeşvar Kalesi Azebler Ağalarının Temeşvar’a ait olan Rovina mukâtaasının bedelini tahsil ettikleri Temeşvar Kal‘ası Azebler ağalarının başağası Sefer Ağa b. İsmail ve Üçüncü Nişli Ağası Mustafa Ağa b. Mahmud nâm kimesneler meclis-i şer‘-i hatîrde Budin Yeniçerileri Çorbacılarından On Dördüncü Yayabaşı Hacı Ahmed Ağa b. Sefer ve Gönüllü Bölükbaşılarından Onuncu Bölükbaşı olan Ali Bölükbaşı b. Mustafa ve Azebler ru’esâsından sekizinci Re’is olan Ali Reis b. Cafer ve Hisareri bölüklerinden Yirmi Dokuzuncu Bölükbaşı olan Musa Bölükbaşı b. Yusuf ve yine Budin Yeniçerilerinin On Beşinci Odası’ndan Hacı Rıdvan Beşe b. Mustafa nâm kimesneler mahzarlarında tav‘an ikrâr ve i‘tirâf edip kadîmü’l-eyyâmdan bu âna gelince Rovina Mukāta‘ası fermân-ı sultânî ile Temeşvar hazînesine Temeşvar Kal‘ası askerine ocaklık ta‘yîn olunup zabt olunur iken sene-i sâbıkada hilâf-ı fermân-ı sultânî Budin tarafından zikr olunan mukāta‘ayı mezkûrûn el-Hâc Ahmed Ağa ve Ali Bölükbaşı ve Ali Reis ve Musa Bölükbaşı ve Hacı Rıdvan Beşe tagallüben zabt ve bir senenin mahsûlü beş bin iki yüz esedî kuruş ahz u kabz eylediklerinden sonra mezkûrûn ile Dîvân-ı sultânîde mürâfa‘a olup zikr olunan mukāta‘a uslûb-ı sâbık üzre bâ-fermân-ı sultânî Hazîne-i Temeşvar’a ta‘yîn ve mukarrer kabîlinden gayrı mezkûrûnun ol diyâr hesâbı üzre beş yük yirmi bin akçe eder beş bin iki yüz esedî kuruşu dahi hazîne-i Temeşvar’a red olunması fermân olunmağın ber-mûceb-i fermân-ı âlî zikr olunan beş bin iki yüz esedî kuruşu kabza mübâşir olduğumuz hasebiyle hazîne-i Temeşvar için mezkûrûn yedlerinden tamâmen ahz u kabz eyledik. Meblağ-ı mezkûrdan mezkûrûn üzerlerinde bâkī kalmadı dediklerinde mukırrân-ı mezkûrânı ikrâr-ı meşrûhlarında el-mukırrûn lehü’l-merkūm vicâhen tasdîk ve şifâhen tahkīk edicek, mâ hüve’l-vâki‘ bi’t-taleb ketb olundu. Fi’l-yevmi’s-sânî min Cumâdelûlâ li sene tis‘a ve hamsîn ve elf. Şuhûdü’l-hâl: Diyârbekirli Osman Çavuş b. Ahmed el-mübâşir, Süleyman Ağa b. Ali, Mehmed Çelebi b. Mehmed, Ahmed Ağa b. İbrahim, Hobyar Ağa b. el-za‘îm, Ali Çelebi b. Sadık.