Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 245 Hüküm no: 267 Orijinal metin no: [63b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hasan Bey’in, Mehmed Çelebi b. Ahmed’e verdiği atı hibe ettiğinin anlaşıldığı Mahmiye-i İstanbul’da Kepenekçi Sinan mahallesi sükkânından Hasan Bey b. ( ) nâm kimesne meclis-i şer‘-i hatîrde işbu sâhibü’l-kitâb Mehmed Çelebi b. Ahmed mahzarında üzerine takrîr-i kelâm edip mezbûr Mehmed Çelebi’ye bundan akdem yedimde mülküm olup otuz riyâlî kuruş kıymetli bir re’s doru atımı i‘âde ve tesellüm edip mezbûr Mehmed dahi isti‘âde ve tesellüm etmişidi. Hâlâ bana teslîmde ta‘annüd eder. Suâl olunup alıverilmesin taleb ederim dedikde, gıbbe’s-suâl <> mezbûr Mehmed Çelebi cevâbında müdde‘î-i mezbûr Hasan Bey vech-i meşrûh üzre iddi‘â eylediği doru atı bana hibe-i sahîha-i şer‘iyye ile hibe ve temlîk ve teslîm edip ben dahi meclis-i hibede zikr olunan atı kabz ve kabûl eyledim deyû def‘ ile mukābele edicek, mezbûr Mehmed Çelebi’nin def‘-i mezbûrunu mübeyyin beyyine taleb olundukda ityân-ı beyyineden izhâr-ı acz ile istihlâf etmeğin, müdde‘î-i mezbûr Hasan Bey’e vech-i muharrer üzerine iddi‘â eylediği atını mezbûr Mehmed Çelebi’ye hibe-i sahîha-i şer‘iyye ile hibe ve temlîk ve teslîm eylemediğine yemîn teklîf olundukda ol dahi yemîn bi’llâhdan nükûl eylemeğin mezbûr Hasan Bey’in nükûlü İmâmeyn-i Hümâmeyn Ebû Yusuf ve Mehmed b. el-Hasan mezhebleri üzre karâr olmağın mûcebince iddi‘â olunan hibenin sıhhatine ve da‘vâ-yı meşrûhasından mezbûr Hasan Bey’in men‘ine mahzarında üzerine hükm olunup mâ hüve’l-vâki‘ bi’t-taleb ketb olundu. Fi’l-yevmi’s-sânî ve’l-ışrîn min Cemâziyelâhir li sene tis‘a ve hamsîn ve elf. Şuhûdü’l-hâl: Süleyman Ağa b. Pîrî, El-muhzırân, el-Hâc Abbas b. el-muhzır, Mustafa Çelebi b. Abdurrahman, el-Hâc Mustafa Çelebi b. Abdullah el-Yesârî, Ali Bey b. Mehmed, İsa Bey Muhzır.