Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 248 Hüküm no: 272 Orijinal metin no: [64b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yusuf Efendi b. Mahmud’un Ahmed Çavuş Vakfı mütevelli kaymakamlığına tayini Mahmiye-i İstanbul’da vâki‘ merhûm Ahmed Çavuş Vakfı’na meşrûtiyyet üzre mütevellîsi olan Sunullah Çelebi b. Mehmed sagīr olup edâ-yı hizmet-i tevliyet adem-i kabûlü olmağla bundan akdem cânib-i şer‘den İbrahim b. Ahmed nâm kimesne kāimmakām-ı mütevellî nasb ve ta‘yîn olunmuşidi. Hâlâ mezbûr İbrahim hizmet-i tevliyet-i mezbûrca tekâsül üzre olup edâ-yı hizmet etmemekle ref‘ olunup yerine işbu râfi‘ül-kitâb Yusuf Efendi b. Mahmud hizmetinde mücidd ü sâ‘î ve tesviye-i umûr-ı vakfı râgıb olduğunu ihbâr etmeğin yerine mezbûr Yusuf Efendi cânib-i şer‘den kāimmakām nasb ve ta‘yîn olundukda ol dahi vech-i meşrûh üzre kāimmakām-ı tevliyet-i mezbûreyi kabûl ve hidemât-ı lâzımesini edâya müte‘ahhid olucak, mâ hüve’l-vâki‘ bi’t-taleb ketb olundu. Fi’l-yevmi’s-sânî aşer min Cumâdelûlâ li sene tis‘a ve hamsîn ve elf. Şuhûdü’l-hâl: Ahmed Efendi b. Yusuf el-imâm, Ali Efendi b. İbrahim, Abdülkādir Efendi b. Mustafa, Mehmed Efendi b. Hüseyin, Yahya Bey b. Zekeriya el-muhzır, Ali Bey b. Ahmed el-muhzır.