Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 251 Hüküm no: 278 Orijinal metin no: [66a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Beşe b. Hasan’ın tarlasının tasarruf hakkını Mehmed b. Ali’ye devri Vilâyet-i Rumeli’nde Ustrova kazâsına tâbi‘ Velican nâm karyeden Mehmed Beşe b. Hasan nâm râcil meclis-i şer‘-i şerîfde işbu râfi‘ül-kitâb Mehmed b. Ali mahzarında tav‘an ikrâr ve i‘tirâf edip işbu akdin [sudû]runa değin yedimde ve taht-ı tasarrufumda olup karye-i mezkûre sınırında ve Nikrat? nâm mevzi‘de vâki‘ bir tarafı Murad b. Mustafa mülküne ve bir tarafı Mustafa b. Hüseyin mülküne ve bir tarafı mezbûr Mehmed mülküne ve bir tarafı tarîk-i âmma müntehî tahmînen iki keyl tohum isti‘âb eder bir kıt‘a tarlamın hakk-ı tasarrufunu sâhib-i arz ma‘rifeti ile mezbûr Mehmed’e dokuz yüz cedîd râyic fi’l-vakt akçe bedel mukābelesinde tefvîz edip ol dahi vech-i muharrer üzre tefevvüz ve kabûl eyledikden sonra bedel-i merkūm dokuz yüz cedîd akçeyi merkūm Mehmed’in yedinden tamâmen alıp kabz edip mârrü’z-zikr tarlayı mahallinde zabt ve tasarrufa taslît eyledim dedikde, mukırr-ı merkūm Mehmed Beşe’yi minvâl-i meşrûh üzre cârî olan ikrârında merkūm Mehmed vicâhen tasdîk ve şifâhen tahkīk etmeğin, mâ hüve’l-vâki‘ bi’t-taleb ketb olundu. Fi’l-yevmi’t-tâsi‘ ve’l-ışrîn min şehri Rebî‘ulâhir li sene tis‘a ve hamsîn ve elf. Şuhûdü’l-hâl: Hüseyin Beşe b. Ali er-râcil, İsmail b. Yunus, Mehmed Beşe b. İsmail, Yusuf b. Abdullah.