Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 254 Hüküm no: 283 Orijinal metin no: [66b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Meyhaneci Yani v. Dimitri’nin ortakları Panayot ve Yani’de olan alacaklarını aldığının tesbiti Mahmiye-i İstanbul’da Kumkapı hâricinde meyhâneci tâifesinden Yani v. Dimitri nâm zimmî meclis-i hatîrde tâife-i mezbûreden olup sâbıkā şerîki olan Panayot v. Estadi ve Yani v. Velisari? nâm zimmîler muvâcehelerinden üzerlerine takrîr-i da‘vâ edip bundan akdem mezbûrân Panayot ve Yani ile meyhânecilik san‘atında akd-i şirket eylediğimizde kendi malımdan yirmi dört bin fıddî râyic fi’l-vakt akçemi mezbûrânın mallarıyla halt edip iki sene mu‘âmele eylediğimizden sonra hâlâ fesh-i şirket edip meblağ-ı mezbûr yirmi dört bin akçe yedlerinde hakkım kalmışdır. Suâl olunup meblağ-ı mezbûrun alıverilmesin taleb ederim dedikde, gıbbe’s-suâl merkūmân Panayot ve Yani cevâblarında fi’l-hakīka müdde‘î-i merkūm ile bundan akdem meyhânecilik san‘atında şerîkler olduğumuzda merkūm Yani’nin yirmi dört bin akçesini kendi malımıza halt edip iki sene mu‘âmele eylediğimizden sonra hâlâ fesh-i şirket eylediğimizde meblağ-ı mezbûru merkūm Yani’ye bi’t-tamâm def‘ ve teslîm edip yedimizde bir akçe ve bir habbe hakkı kalmamışdır dediklerinde, merkūmânın yedleri yed-i emânet olmağla bi’l-istihlâf merkūmân Panayot ve Yani’ye minvâl-i muharrer üzre yedlerinde müdde‘î-i merkūmânın yirmi dört bin akçe hakkı olmadığına her birine yemîn teklîf olundukda onlar dahi yemîn billâh ellezî enzele’l-incîle alâ İsâ aleyhi’s-selâm etmeğin, mâ vaka‘a bi’t-taleb ketb olundu. Fi’l-yevmi’s-sâlis min Cumâdelûlâ li sene seb‘a ve hamsîn ve elf. Şuhûdü’l-hâl: Salih Çavuş b. Yusuf, Dilaver Çavuş b. Abdullah, Ali Çelebi b. Mehmed, Ahmed Çelebi b. Abdurrahman.