Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 260 Hüküm no: 289 Orijinal metin no: [68b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sefer Beşe b. Oruc’un terekesinin ortaya çıkan vârisleri Mehmed Beşe b. Malkoç ve Mustafa b. Yusuf’a teslimi Medîne-i Hazret-i Ebâ Eyyûb el-Ensârî mahallâtından Câmi‘-i Kebîr mahallesinde Herkiz? [Mehmed] Beşe b. Malkoç asâleten ve mahmiye-i İstanbul’da Langa kurbunda Çakır Ağa mahallesinde sâkine olup Mustafa b. Yusuf nâm sagīrin kıbel-i şer‘-i enverden mansûbe vasîsi olan Âlime bt. Mustafa vesâyeten meclis-i şer‘-i hatîrde altmış ikinci cemâ‘at bölüğünden olup bundan akdem Azak’da vefât eden Sefer Beşe b. Oruc’un zâhirde vâris-i ma‘rûfu olmak zu‘muyla terekesine bi’l-emâne vaz‘-ı yed edip mahmiye-i İstanbul’da bi’l-fi‘l Beytülmâl-ı râcilîn emîni olan İlyas Ağa b. Sinan tarafından husûs-ı âti’l-beyânı vekîl olup bimâ-hüve nehcü’s-sübût şer‘an vekâleti sâbite olan Mehmed Beşe b. Mustafa mahzarında üzerine her biri asâleten ve vesâyeten takrîr-i da‘vâ edip ben ve sagīr-i mezbûr Mustafa müteveffâ-yı mezbûr Sefer Beşe’nin li ebeveyn karındaşları oğulları ve vârisleri [vech-i] muharrer üzre karındaşları oğulları olduğumuzu müteveffâ-yı mezbûr hâl-i hayât ve nefâz-ı tasarrufâtında alâ ru’ûsi’l-istişhâd ikrâr dahi eylemişdir. Bi hasebi’l-irsi’ş-şer‘î tereke-i müteveffâ-yı mezbûr şer‘an bize isâbet ve intikāl etmişken hâlâ emîn-i mezbûr tereke-i müteveffâ-yı mezbûra kasr-ı yedine tenbîh ve asâleten ve vesâyetimiz hasebiyle bize teslîm olunmasın taleb ederiz dediklerinde gıbbe’s-suâl vekîl-i mezbûr müvekkil-i mezbûrun vech-i meşrûh üzre tereke-i müteveffâ-yı mezbûra vaz‘-ı yed eylediğini ikrâr, lâkin merkūm Mehmed Beşe’nin ve sagīr-i mezbûr Mustafa’nın müteveffâ-yı mezbûrun karındaşları oğulları olduğunu inkâr edicek, merkūm Mehmed Beşe’den vasiyy-i merkūme Âlime’den da‘vâ-yı meşrûhalarını mübeyyin beyyine taleb olundukda, udûl-i ricâl-i müslimînden olup mârrü’z-zikr Çakır Ağa mahallesi müezzini Derviş Çelebi b. Halil ve (…) Mustafa Çelebi b. Cafer ve mahalle-i mezbûre sükkânından Mustafa b. İvaz nâm kimesneler li ecli’ş-şehâde meclis-i şer‘a hâzırân olup gıbbe’l-istişhâd her biri şehâdet edip fi’l-hakīka Azak’da vefât edip Sefer Beşe hâl-i hayât ve nefâz-ı tasarrufâtında işbu Mehmed Beşe ve sagīr-i merkūm Mustafa için benim li ebeveyn karındaşlarım oğullarıdır deyû bizim huzûrumuzda tav‘an ikrâr ve i‘tirâf eyledi. Bu vechile merkūm Mehmed Beşe ve sagīr-i mezbûr Mustafa müteveffâ-yı mezbûrun vârisleridir. <> emîn-i mezbûrun tereke-i müteveffâ-yı mezbûrdan kasr-ı yedi ve merkūmâna teslîmi vâcibdir. Biz bu husûsa bu vech üzre şâhidleriz, şehâdet dahi ederiz deyû her biri edâ-yı şehâdet-i şer‘iyye eylediklerinde gıbbe ri‘âyeti şerâyiti’l-kabûl şehâdetleri makbûle oldukdan sonra şehâdet-i mezbûrun tereke-i müteveffâ-yı mezbûrdan kasr-ı yedine ve merkūm Mehmed Beşe’ye ve vasiyy-i merkūm Âlime Hâtun’a teslîmine vekîl-i mezbûr mahzarında hükm-i şer‘î ile hükm olunup mâ vaka‘a bi’t-taleb ketb olundu. Hurrire fi’l-yevmi’l-hâmis min Cumâdelûlâ li sene tis‘a ve hamsîn ve elf. Şuhûdü’l-hâl: Ali Bey b. Mustafa, Durak Bey b. Pîrî, Mustafa Çelebi b. Mehmed es-sarrâcü’s-sultânî, İbrahim Efendi b. Şaban.