Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 258 Hüküm no: 288 Orijinal metin no: [68a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Müderris Mustafa Efendi’nin borçlarının terekesinden ödendiği, vârislerinin de birbirinde hakları kalmadığı Mahmiye-i İstanbul’da Muhtesib Karagöz mahallesinde sâkin olup mahmiye-i mezbûrede Kadırga Limanı’nda vâki‘ Mehmed Paşa Medresesi müderrisi olduğu hâlde vefât eden Mustafa Efendi b. İsmail Ağa’nın verâseti vâlidesi fahrü’l-muhadderât Fâtıma Hâtun bt. el-merhûm Hoca Mustafa Efendi’ye ve zevce-i metrûkesi Afrasyab Hâtun bt. Abdullah’a ve sulbiye kebîre kızları Emetullah Hâtun’a ve Rukiye Hâtun’a ve li ebeveyn kız karındaşı Ayşe Hâtun’a münhasıra olduğu şer‘an sâbit ve mütehakkık oldukdan sonra mezbûrât Afrasyab Hâtun ve Emetullah Hâtun ve Rukiye Hâtun ve Ayşe Hâtun taraflarından husûs-ı âti’l-beyânı ikrâra vekîl olup mezbûrâtı ma‘rifet-i şer‘iyye ile ârifân olan Mehmed Çelebi b. Piyâle ve Mehmed Çelebi b. Bünyad nâm kimesneler şehâdetleriyle şer‘an vekâleti sâbite olan Hüseyin Efendi b. Mustafa meclis-i şer‘-i şerîfde işbu râfi‘ül-kitâb mûmâ-ileyhimâ Fâtıma Hâtun tarafından husûs-ı âti’z-zikirde olan ikrârı tasdîka vekîl olup vekâleti bimâ-hüve nehcü’s-sübût şer‘an sâbite olan kıdvetü’l-müderrisîn Abdülvehhâb Efendi b. Abdüllatif Efendi mahzarında tav‘an bi’l-vekâle ikrâr ve i‘tirâf edip müvekkilelerim mezkûrât Afrasyab Hâtun ve Rukiye Hâtun ve Emetullah Hâtun ve Ayşe Hâtun’un mûrisleri müteveffâ-yı mezbûr Mustafa Efendi’nin Ali Efendi b. ( ) nâm kimesneye yirmi beş bin sekiz yüz cedîd râyic fi’l-vakt akçe deyni ve Ali Çelebi b. Mehmed’e on üç bin cedîd akçe deyni ve Ahmed Bey b. İbrahim Han’a on altı bin akçe deyni ve on altı bin cedîd akçe dahi Hoca Hasan Çelebi’ye deyni, Kırkım Abdülkerim b. Yahya nâm kimesneye dokuz bin beşyüz cedîd akçe deyni ve Arakiyyeci Raziye Hâtun bt. ( ) dokuz bin beş yüz cedîd akçe deyni ve Afrasyab Hâtun’a mehr-i müeccelinden on bin cedîd akçe deyni ve Ayşe Hâtun bt. İsmail Ağa’ya dört bin altı yüz akçe deyni ve Hayrünnisa Hâtun bt. ( ) beş bin cedîd akçe deyni ve Yümnî Hâtun bt. ( ) iki bin sekiz yüz cedîd akçe deyni ve Kasab Dilaver b. Abdullah’a üç bin sekiz yüz kırk akçe deyni ve Elli Yedinci Ağa Bölüğü’nde odabaşı olan Mehmed Çelebi b. ( ) iki bin altı yüz altmış beş cedîd akçe deyni ve Nerdübânlı Mescid Vakfına mütevellî olan Mahmud Efendi b. ( ) yedinden istidâne eylediği asl-ı mâl ve murâbahadan üç bin yedi yüz akçe ve Bezzâzistâncı Ali Çelebi’ye iki [bin] doksan beş cedîd akçe deyni ve Nasuh Paşazâde Vakfına mütevellî olan Osman Ağa b. ( ) iki bin doksan cedîd akçe deyni ve Neriman bt. Abdullah dört bin beşyüz altmış akçe deyni ve Küşade bt. Abdullah’a bin akçe eyni ve Haffâf Habib b. Mehmed’e altı yüz altmış akçe deyni ve Musaffa bt. Abdullah nâm hâtuna dokuz [yüz] yirmi cedîd akçe deyni ve Haffâf İsmail Beşe’ye seksen akçe deyni ve Süleymaniye kurbunda Mehmed Câmi‘i imâmı Abdülvehhâb Efendi’ye asl-ı mâl ve murâbahadan iki bin altı yüz cedîd akçe deyni ve Ahmed b. ( ) yüz yirmi altı akçe deyni ve Musa Çelebi b. ( ) asl-ı mâl ve murâbahadan dokuz bin yüz akçe deyni ve Elkiz nâm Yahudi’ye yedi bin dokuz yüz seksen akçe deyni ve Nakkaş Yahudi’ye dört yüz akçe deyni ve Çelebi Yahudi’ye dört yüz seksen akçe deyni ve Halil Beşe b. ( ) bir dört yüz otuz akçe deyni ve Hoca Ferruh b. Abdullah’a bin yüz akçe deyni ve Sütçü dâmâdı Mardiros v. Azad nâm Ermeni’ye altı yüz elli akçe deyni ve Ayakbasanzâde Mehmed Efendi b. Mustafa’ya iki bin dört yüz akçe deyni ve Derâkî Ahmed Çelebi’ye dört yüz elli akçe deyni ve Saka Dimo v. ( ) dört yüz akçe ve zıbıncı Ermeni’ye beş yüz on akçe deyni ve Başçı Mahmud Vakfından Horhor’da vakıf dekâkîn icâresinden iki yüz kırk akçe deyni ve Mismârî Mehmed b. Yusuf’a yüz altmış bir akçe deyni ve Gömlekçiye yetmiş beşakçe deyni ve Hasım Mehmed Çelebi b. Ahmed’e bin yedi yüz yirmi beş akçe ve Osman Efendi’ye asl-ı mâl ve murâbahadan bin yüz seksen akçe deyni ve Rıdvan b. Şaban’a sof bahâsından bin iki yüz akçe ve Üstâd Hasan’a iki yüz kırk akçe ve Kireçci Mardiros v. Zarka’ya üç yüz akçe ve Piyâle b. Abdullah’a dört yüz on akçe ve Zıbıncı’ya yüz altmış akçe ve Ali Halîfe’ye iki yüz yirmi beş akçe ve Fidancı’ya yüz sekiz akçe ve Kuyumcuzâde Mehmed b. Piyâle’ye altı yüz kırk akçe ve Abdülvehhâb Efendi b. Abdüllatif Efendi’ye altı yüz kırk akçe ve Mehmed Beşe b. ( ) elli akçe ve Hüseyin Efendi’ye elli akçe ve Keresteci Hüseyin’e bin yüz altmış akçe ve Hoşkadem mahallesi müezzini Yusuf Halîfe’ye iki bin akçe ve Simkeş Ali Çelebi’ye dört yüz akçe ve Şaban Bey’e üç yüz seksen akçe ve a‘lemü’l-ulemâ’i’l-izâm Ebü’l-fazl Mehmed Efendi’ye beş bin altı yüz akçe ve Mustafa Çavuş b. Abdullah nâm kimesneye dokuz bin üç yüz altmış akçe ve Kara Ali b. ( ) asıl ve murâbahadan on bin akçe ve Meyhâneci İstati v. Dimo’ya altı bin akçe ve Fırıncı Köse zimmîye sekiz bin altı yüz akçe ve Abdullah’a üç yüz akçe cem‘an iki yük on iki bin yüz beş akçe düyûnu olup kable’l-îfâ vefât etmekle terekesinden edâsı lâzım gelmeğin mûmâ-ileyhâ Fâtıma Hâtun’u tereke-i müteveffâ-yı mezbûru bey‘ ve ashâb-ı düyûna semeninden îfâya müvekkilâtım taraflarından vekîl edip ol dahi ba‘de’l-kabûl tereke-i müteveffâ-yı mezbûreyi bey‘ edip semeninden bi’l-asâle ve bi’l-vekâle cümle düyûnu ashâb-ı mezkûruna edâ ve îfâ eylemişdir. Min ba‘d müvekkilâtımın müteveffâ-yı mezbûrun terekesine müte‘allika mezbûre Fâtıma Hâtun üzerine da‘vâ ve hakları yokdur dedikde, gıbbe’t-tasdîki’ş-şer‘î mâ vaka‘a bi’t-taleb ketb olundu. Fî gurre-i Cumâdelûlâ li sene tis‘a ve hamsîn ve elf. Şuhûdü’l-hâl: Mustafa Çavuş b. Mehmed, Abdülkerim Halîfe b. Ali el-müezzin, Yahya b. Zekeriya, Ahmed Çelebi b. Abdülbâkī, Osman Çelebi b. Mehmed, [Abdurrahman] Efendi b. Mehmed an kazâ-i Ova, Rıdvan b. Şaban ve gayruhüm mine’l-huzzâr.