Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 262 Hüküm no: 291 Orijinal metin no: [69a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Çörekçi Ahmed b. Abdullah’ın at değirmeni ve müştemilatı hissesini Panayot v. Yani’ye satması Mahmiye-i İstanbul’da Mimar Ayas mahallesinde sâkin Çörekçi Ahmed [b.] Abdullah meclis-i şer‘-i hatîr-i lâzımü’t-tevkīrde işbu râfi‘ü’l-vesîka Panayot v. Yani nâm zimmî muvâcehesinde tav‘an ikrâr ve i‘tirâf edip mahmiye-i mezbûre Yedikule hâricinde Kürkçü el-Hâc Hüseyin mahallesinde vâki‘ bir tarafı Kuyumcu Aslan v. ( ) mülküne ve bir tarafı ( ) b. mülküne ve iki tarafı tarîk-i âmma müntehî olup beher mâh Bahtî Çelebi ve Bazar nâm zimmîye yetmiş akçe ile icâresi olup taht-ı yedimde olan dam içinde vâki‘ yedimde mülk ve hakkı olan bir göz at değirmeninin ve seng deyrinin? rub‘ sehm-i şâyi‘ini kâffe-i hukūkuyla ve altı atının ve anbarının ve yemliğin dahi rub‘ sehm-i şâyi‘lerini kâffe-i hukūkuyla ve merâfıkıyla mezbûr Panayot’a altı bin fıddî râyic fi’l-vakt akçeye safka-i vâhide ile bey‘-i bâtt-ı sahîh-i şer‘î ile bey‘ ve teslîm edip ol dahi minvâl-i muharrer üzre iştirâ ve tesellüm ve kabûl eyledikden sonra semeni ve kabûl eyledikden sonra semen-i mezbûru ikrâr-ı meşrûhunda el-mukırrûn lehü’l-merkūm vicâhen tasdîk ve şifâhen tahkīk mâ hüve’l-vâki‘ bi’t-taleb ketb olundu. Fi’l-yevmi’t-tâsi‘ min Cumâdelâhir li sene tis‘a ve hamsîn ve elf. Şuhûdü’l-hâl: Habib Çelebi b. Mehmed el-kâtib, Yahya Bey b. Ali, Hasan Dede b. Abdurrahman, Mehmed Çelebi b. Habib, Ahmed Beşe b. Mustafa, Yusuf b. Mustafa, Yusuf b. Abdullah.