Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 262 Hüküm no: 292 Orijinal metin no: [69a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Çörekçi Ahmed b. Abdullah’ın at değirmeni ve müştemilatı hissesini İstati v. Panayot’a satması Mahmiye-i İstanbul’da Mimar Ayas mahallesinde sâkin Çörekçi Ahmed b. Abdullah meclis-i şer‘-i hatîr-i lâzımü’t-tevkīrde işbu râfi‘ü’l-vesîka İstati v. Panayot nâm zimmî muvâcehesinde tav‘an ikrâr ve i‘tirâf edip mahmiye-i mezbûrede Yedikule kurbunda Kürkçü el-Hâc Hüseyin mahallesinde vâki‘ bir tarafı Kuyumcu Aslan v. ( ) mülküne ve bir tarafı ( ) b. ( ) mülküne ve iki tarafı tarîk-i âmma müntehî olup beher mâh Yahya Çelebi ve Bazar nâm zimmîye yetmişer akçe icâresi olup taht-ı yedimde olan dam içinde vâki‘ yedimde mülk ve hakkım olan bir göz at değirmeninin ve seng deyrinin? râbi‘ sehm-i şâyi‘ini kâffe-i hukūkuyla ve altı atının ve anbarının ve yemliğinin dahi rub‘ sehm-i şâyi‘lerini kâffe-i hukūk ve merâfıkı ile mezbûr İstati’ye altı bin fıddî râyic fi’l-vakt akçeye safka-i vâhide ile bey‘-i bâtt-ı sahîh-i şer‘î ile bey‘ ve teslîm edip ol dahi minvâl-i muharrer üzre iştirâ ve teslîm <> ve kabûl eyledikden sonra semen-i mezbûr altı bin akçeyi mezkûr İstati yedinden tamâmen ahz u kabz eyledim dedikde mukırr-ı mezbûru ikrâr-ı meşrûhunda el-mukarru lehü’l-merkūm İstati bi’l-muvâcehe tasdîk ve şifâhen tahkīk edicek, mâ hüve’l-vâki‘ bi’t-taleb ketb olundu. Hurrire fi’l-yevmi’t-tâsi‘ min Cumâdelâhir li sene tis‘a ve hamsîn ve elf. Şuhûdü’l-hâl: Es-Sâbıkûn.