Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 83 Hüküm no: 1 Orijinal metin no: [1a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kurd v. Arslan’ın terekesi hususunda varislerinden karısı Fori bt. Yasef ile kız kardeşi Ayna’nın sulh oldukları Mahmiye-i İstanbul’da Yedikule kurbünde Mirahor mahallesinde sâkin iken hâlik olan Kurd v. Arslan nâm zimmînin verâseti zevce-i metrûkesi Fori bt. Yasef nâm Nasrâniye’ye ve li-ebeveyn kız karındaşı Ayna’ya ve li-üm karındaşları Bekler ve Yasef ibney Ellez nâm zimmîlere ve li-üm kız karındaşı Fori bt. Ellez nâm Nasrâniye’ye münhasıra olduğu ve tereke-i hâlik-i mezkûrun rub‘u zevcesi mezkûre Fori’ye ve nısfı li-ebeveyn kız karındaşı mezkûre Ayna’ya ve südüsü li-üm karındaşları mezkûrân Bekler ve Yasef ile li-üm kız karındaşı mezkûre Fori’ye isâbet eylediği şer‘an mütehakkık oldukdan sonra mezkûre Ayna’nın zevci ve tarafından husûs-ı âti’l-beyânı ikrâra vekîli olup vekâleti mahalle-i mezkûre ahâlîsinden Papa Sart v. Papa Tavarsi ve Nikola v. Oruc nâm zimmîler şehâdetleri ile sâbite olan Tanrıverdi v. Tavarsi nâm zimmî meclis-i şer‘-i hatîr-i lâzimü’t-tevkīrde hâlik-i mezkûrun terekesine vâzı‘atü’l-yed olan zevcesi mezkûre Fori mahzarında bi’l-vekâle tav‘an ikrâr ve i‘tirâf edip tereke-i hâlik-i mezkûrdan olup mahalle-i mezkûrede vâki‘ bir tarafdan Bekler ve Yasef mülklerine ve bir tarafdan Maşa ve Fori bintey Hudâverdi mülklerine ve bir tarafdan Mesip v. Yanaki nâm zimmî mülküne ve bir tarafdan tarîk-ı âmma müntehî üç bâb fevkānî odayı ve altında bir bâb odayı ve bir ahırı ve su kuyusunu ve bir tahtânî sofayı ve cüneyneyi müştemil olup kıymeti seksen bin akçe takvîm olunan menzilimden ve yine tereke-i hâlik-i mezkûrdan olup mecmû‘unun kıymeti yirmi bin akçe takvîm olunan esâs-ı beyt ve evânî-i nuhâsiyye ve gayr-ı nuhâsiyyeden ve yine tereke-i hâlik-i mezkûrdan olup kıymeti on bin akçe takvîm olunan Rusiyyetü’l-asl Sofya nâm Nasrâniye câriyeden müvekkilem mezkûre Ayna karındaşı hâlik-i mezkûrun terekesinden irs-i şer‘le kendiye isâbet nısf hisse-i şer‘iyyesini hâlik-i mezkûrun terekesine vâzı‘atü’l-yed olan zevcesi mezkûre Fori’den da‘vâ ve taleb ettiğinde beynlerinde muslihûn tavsît [tavassut] edip müvekkilem mezkûre Ayna’yı nısf hisse-i şâyi‘a-i şer‘iyyesi mukābelesinde şerâit-i sulhu câmi‘-i [cemî‘-i] mevâni‘den ârî tehârüc-i şer‘î tarîkı üzere on iki bin akçe-i fıddî râyic fi’l-vakt akçe üzerine sulh ettiklerinde ol dahi [sulh-ı] mezkûru kabûl ve bedel-i sulh olan meblağ-ı mezkûr on iki bin akçeyi tereke-i hâlik-i mezkûrdan mezbûre Fori yedinden tamâmen ahz u kabz edip tereke-i hâlik-i mezkûr da‘vâsından zevcesi mezkûr Fori’nin zimmetini ibrâ-i âmm-ı kātı‘u’n-nizâ‘la ibrâ ve ıskāt eyleyip müvekkilem mezkûre Ayna’nın tereke-i hâlik-i mezkûra müte‘allika bi-vechin mine’l-vücûh ve sebebin mine’l-esbâb da‘vâ ve hakkı kalmadı dedikde vekîl-i mezkûr Tanrıverdi’yi vech-i muharrer üzere cârî ve sâdır olan ikrârında mezkûr Fori vicâhen tasdîk ve şifâhen tahkīk edicek mâ-hüve’l-vâki‘ bi’t-taleb ketb olundu. Tahrîren fi’l-yevmi’s-sâlis min şehri Ramazâni’l-mübârek li-sene seb‘a ve sittîn ve elf. Şühûdü’l-hâl: Mehmed Efendi b. Ali el-imâm, Muslı Çelebi b. Mehmed el-müezzin, İsmail Çelebi b. Mehmed, Mehmed Çelebi b. İbrahim, İbrahim Çelebi b. Abdullah ve gayruhüm mine’l-hâzırîn.