Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 84 Hüküm no: 2 Orijinal metin no: [1a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yanaki v. Yako’nun Lefteri v. Mihali’ye Güzelhisar kasabasındaki bahçesini satıp iki adet tarlasının da kullanım hakkını devrettiği Fi’l-asl Vilâyet-i Rumeli’nde Güzelhisar kasabasında Kasro mahallesi sükkânından olup gemici tâifesinden Yanaki v. Yako nâm zimmî meclis-i şer‘-i hatîr-i lâzimü’t-tevkīrde işbu bâ‘isü’s-sifr Lefteri v. Mihali nâm zimmî muvâcehesinde ikrâr ve takrîr-i kelâm edip silk-i mülkümde münselik olup vâlidem Kondilye nâm Nasrâniye’den müntakil zikri mürûr eden Güzelhisar kasabasında Hora mahallesinde vâki‘ bir tarafı Klafet nâm zimmî bahçesi ve bir tarafı Kara Dimitri bahçesi ve bir tarafı Kandil bahçesi ve bir tarafı tarîk-ı âm ile mahdûd içinde Ayasofya Kenîsesi demekle ma‘rûf kenîse olan bahçemi bi-cümleti’t-tevâbi‘ ve’l-levâhık tarafeynden îcâb ve kabûlü hâvî bey‘-i bâtt-ı sahîh-i şer‘î ile otuz beş kıt‘a riyâlî guruşa mezbûr Lefteri’ye bey‘ ve teslîm ol dahi iştirâ ve kabûl eyledikden sonra yine kasaba-i mezbûrede İncirli Limanı demekle [ma‘rûf] mevzi‘de vâki‘ lede’l-ahâlî ve’l-cîrân ma‘lûmü’l-hudûd bir kıt‘a tarla ve yine kasaba-i mezbûrede Dayarina nâm mevzi‘de vâki‘ lede’l-[ahâlî ve’l]-cîrân ma‘lûmü’l-hudûd bir kıt‘a tarla ve yine kasaba-i mezbûrede Uskoroyali nâm mevzi‘de vâki‘ ma‘lûmü’l-hudûd bir kıt‘a tarlamı dahi ma‘rifet-i sâhib-i arz ile merkūm Lefteri’ye yirmi beş riyâlî guruş bedel mukābilesinde ferâğ ve tefvîz ol dahi tefevvüz ve kabûl eyledikden sonra semen-i mezbûr otuz beş guruş ve bedel-i tefvîz olan yirmi beş riyâlî guruş ki cem‘an altmış kıt‘a riyâlî guruşu mezbûr Lefteri yedinden tamâmen ahz u kabz edip zikri mürûr eden bahçe ile tarlaları mahallinde kabz ve tasarrufa mezbûr Lefteri’yi taslît eyledim ba‘de’l-yevm zikrolunan bahçe mezbûr Lefteri’nin mülk-i müşterâsıdır ve tarlalar dahi hakk-ı müfevvazıdır dedikde gıbbe’t-tasdîkı’l-mu‘teber mâ-vaka‘a bi’t-taleb ketb olundu. Fi’l-yevmi’r-râbi‘ min şehri Ramazâni’l-mübârek li-sene seb‘a ve sittîn ve elf. Şühûdü’l-hâl: Ahmed b. Resul, İsmail b. Yunus, Mustafa b. Abdullah, Osman Beşe b. Sevindik, Ali Bey b. Ahmed, Ca‘fer Bey b. Abdullah ve gayruhüm mine’l-hâzırîn.