Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 85 Hüküm no: 3 Orijinal metin no: [1a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Aligori v. Todori’nin Ahtapolu köyündeki bazı emlak ve eşyasını Mihalaki v. Kosta’ya sattıktan sonra bedelini hibe ettiği Vilâyet-i Rumeli’nde Ahyolu kazâsına tâbi‘ Ahtapolu nâhiyesinde piskopos olan Aligori v. Todori nâm râhib meclis-i şer‘-i hatîrde işbu bâ‘isü’s-sifr Mihalaki v. Kosta nâm zimmî muvâcehesinde ikrâr ve takrîr-i kelâm edip silk-i mülkümde münselik olup zikrolunan Ahtapolu karyesinde vâki‘ bir tarafı Laz Yorgi nâm zimmî mülküne ve bir tarafı Kostantin nâm zimmî mülküne ve bir tarafdan Yorgi mülküne ve bir tarafı tarîk-ı âmma müntehî üç odayı ve sofa ve havlu ve cüneyneyi müştemil mülk menzilimi ve yine karye-i mezbûrede vâki‘ lede’l-ahâlî ve’l-cîrân ma‘lûmü’l-hudûd bir kıt‘a mülk bağımı ve yine karye-i mezbûrede Dere nâm mevzi‘de vâki‘ lede’l-cîrân ma‘lûmü’l-hudûd bir kıt‘a mülk çayırımı bi-cümleti’t-tevâbi‘ ve’l-levâhık ve kâffeti’l-hukūk ve’l-merâfık ve menzil-i mezbûr dâhilinde mevcûde olan dört müsta‘mel kebe ve bir döşek ve üç aded beledî yasdık ve bir tencere ve bir kazgan ve bir tâbe ve bir sepet sandığı ve bir velense ve iki şarâb varili ve iki şarâb fıçımı tarafeynden îcâb ve kabûlü hâvî bey‘-i bâtt-ı sahîh-i şer‘î ile mezbûr Mihalaki’ye on bin akçeye bey‘ edip ol dahi vech-i muharrer üzere iştirâ ve kabûl eyledikden sonra semeni olan meblağ-ı mezbûr on bin akçeye mezbûr Mihalaki’ye hibe-i sahîha-i şer‘iyye ile hibe ve teslîm ol dahi meclis-i hibede ittihâb ve kabûl ve kabz eyleyip emlâk-i mezkûre ile eşyâ-i mezbûreyi mahallinde kabz ve tasarrufa merkūm Mihalaki’yi taslît eyledim ba‘de’l-yevm emlâk-i mezbûre ile eşyâ-i mesfûre merkūm Mihalaki’nin mülk-i müşterâsıdır keyfe mâ yeşâ ve yahtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sânî min şehri Ramazâni’l-mübârek li-sene seb‘a ve sittîn ve elf. Şühûdü’l-hâl: Muslı Çelebi b. Memi, Halil Çelebi b. Halil, Osman Beşe b. Sevindik, Ali Bey b. Ahmed, Ca‘fer Bey b. Abdullah ve gayruhüm.