Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 86 Hüküm no: 5 Orijinal metin no: [1b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kirya v. Bogos’un geri dönüşü olmak kaydıyla bazı emlakini Osman Beşe b. Mustafa’ya satıp bazısının da kullanım hakkını devrettiği Vilâyet-i Anadolu’da Divriği kazâsına tâbi‘ Pekirdin nâm karyede sâkin Kirya v. Bogos nâm zimmî meclis-i şer‘-i hatîr-i lâzimü’t-tevkīrde işbu bâ‘isü’l-vesîka Osman Beşe b. Mustafa mahzarında ikrâr ve takrîr-i kelâm edip karye-i mezbûrede vâki‘ Osman Beşe tarlası ve bir tarafı karındaşım Bazyak nâm zimmî bağına ve bir tarafı Zaket nâm zimmî tarlasına ve bir tarafı Görgi’nin bağına müntehî nısf çapalık mülk bağımı on beş kıt‘a riyâlî guruşa bir sene tamâmına değin bey‘ bi’l-vefâ tarîkı ile mezbûr Osman Beşe’ye bey‘ ol dahi iştirâ ve kabûl eyledikden sonra yine karye-i mezbûrede vâki‘ lede’l-ahâlî ve’l-cîrân ma‘lûmü’l-hudûd bir dönüm tarlamı dahi ma‘rifet-i sâhib-i arz ile târih-i kitâbdan bir [sene] tamâmına değin on riyâlî guruş bedel mukābilesinde tefvîz bi’l-vefâ tarîkı ile mezbûr Osman Beşe’ye ferâğ ve tefvîz ol dahi tefevvüz ve kabûl eyledikden sonra semeni olan meblağ-ı mezbûr ve bedel-i tefvîz olan meblağ-ı mezbûr on guruş ki cem‘an yirmi beş riyâlî guruşu tamâmen mezbûr Osman yedinden ahz u kabz edip mahallinde kabz ve tasarrufa taslît eyledim dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’l-hâmis min şehri Ramazâni’l-mübârek li-sene seb‘a ve sittîn ve elf. Şühûdü’l-hâl: Osman Beşe çukadâr, Ca‘fer b. Abdullah, İsmail Çelebi, İsa Bey b. Ahmed ve gayruhüm.