Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 86 Hüküm no: 6 Orijinal metin no: [1b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Dimitri v. Nikola’nın ölen Mağdo bt. Maşol’un tek varisi olduğunu ispat ettiği Havâss-ı aliyye kazâsına tâbi‘ Küçükçekmece nâhiyesinde Ayastefanos nâm karyede sâkine iken hâlik olan Mağdo bt. Maşol nâm Nasrâniye’nin li-ebeveyn ammisi oğlu ve hasrân vârisiyim deyu usûbet-i nesebiyye cihetinden verâset iddiâ eden Dimitri v. Nikola nâm zimmî meclis-i şer‘-i hatîr-i lâzimü’t-tevkīrde mirahor-ı kebîr tarafından karye-i mezkûrede vâki‘ beytü’l-mâl-ı âmmeyi zabta me’mûr olan Ali Bey b. Mustafa mahzarında üzerine takrîr-i da‘vâ edip hâlike-i mezbûre Mağdo’nun babası mezkûr Maşol benim babam mezkûr Nikola ile li-ebeveyn karındaşlar olup babaları ismi Kosta nâm zimmî ve maskat-ı re’si karye-i mezkûre olup verâseti usûbet cihetinden bana münhasıra iken mezbûr Ali Bey tereke-i hâlike-i mezkûreden olup karye-i mezbûrede vâki‘ bir tarafdan Papa Velisari nâm [zimmî] mülküne ve bir tarafdan Yani v. Aleksi mülküne ve iki tarafdan tarîk-ı âmma müntehî iki bâb tahtânî odayı ve cüneyneyi ve müşterek su kuyusunu ve bir mikdâr arsa-i hâliyeyi müştemil olan menzile tasarrufuma mâni‘ olunur suâl olunup kasr-ı yedine tenbîh olunması matlûbumdur dedikde gıbbe’s-suâl mezbûr Ali Bey müdde‘î-i mezkûr Dimitri’nin vech-i muharrer üzere verâsetini bi’l-külliyye inkâr edicek mezbûr Dimitri’den müdde‘âsını mübeyyine beyyine taleb olundukda fi’l-asl karye-i mezkûre ahâlîsinden olup mahmiye-i İstanbul’da Koca Mustafa Paşa mahallesinde sâkin Ömer b. Abdullah ve Samatya kurbünde sâkin Muharrem Beşe b. Abdullah nâm kimesneler li-ecli’ş-şehâde meclis-i şer‘a hâzırân olup istişhâd olunduklarında fi’l-hakīka müdde‘î-i mezbûr Dimitri hâlike-i mezbûre Mağdo’nun li-ebeveyn ammisi oğlu olup mezbûr Dimitri’nin babası mezkûr Nikola hâlike-i mezbûrenin babası mezbûr Maşol ile li-ebeveyn karındaşlar olup babaları ismi mezbûr Kosta ve maskat-ı re’sleri karye-i mezkûredir müdde‘î-i mezbûr Dimitri hâlike-i mezbûre Mağdo’nun usûbet-i nesebiyye cihetinden hasran vârisi olup müdde‘î-i mezbûr Dimitri’den gayrı vâris-i ma‘rûfu ve terekesine müsatıhkk-ı âhar olduğu ma‘lûmumuz değildir biz bu husûsa bu vech üzere şâhidleriz şehâdet dahi ederiz deyu herbiri edâ-i şehâdet-i şer‘iyye ettiklerinde gıbbe ri‘âyeti şerâiti’l-kabûl şehâdetleri makbûle olmağın mezbûrânın şehâdetleri mûcebince mezbûr Ali Bey’in menzil-i mezkûrdan kasr-ı yedine tenbîh olunup mâ-hüve’l-vâki‘ bi’t-taleb ketb olundu. Tahrîren fi’l-yevmi’l-hâmis min şehri Ramazâni’l-mübârek li-sene seb‘a ve sittîn ve elf. Şühûdü’l-hâl: İsa Bey b. Ahmed, el-Hâc Ca‘fer b. Abdullah, İsmail Çelebi b. Yunus, Ahmed Çelebi b. Abdülkerim ve gayruhüm.