Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 87 Hüküm no: 7 Orijinal metin no: [1b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacı Halil b. İsmail’in merhum Ahmed Çelebi’den kendisine intikal eden cariye ile cariyenin kızını azat ettiği Vilâyet-i Anadolu’da Mihaliç kazâsına tâbi‘ Tophisar nâm karyede sâkin iken vefât eden Ahmed Çelebi b. Ali’nin verâseti vâlidesi Senayi bt. el-Hâc Emrullah nâm hâtuna ve li-ebeveyn kız karındaşı Sitti nâm hâtuna ve ammisi el-Hâc Halil b. İsmail’e münhasıra olduğu ve müteveffâ-yı mezbûrun terekesi altı sehm i‘tibâr olunup sihâm-ı mezkûreden iki sehmi vâlidesi mezbûre Senayi’ye ve üç sehmi kız karındaşı mezkûre Sitti’ye ve bir sehmi ammisi mezbûr el-Hâc Halil’e isâbet eylediği şer‘an mütebeyyin oldukdan sonra mezkûr el-Hâc Halil meclis-i şer‘-i hatîr-i lâzimü’t-tevkīrde mûrisi müteveffâ-yı mezbûr Ahmed Çelebi’nin câriye-i memlûkesi olan işbu açık kaşlı orta boylu göğ elâ gözlü sarışın Rusiyyetü’l-asl Müslimetü’l-mille Sehergâh bt. Abdullah mahzarında tav‘an ikrâr ve i‘tirâf edip mezkûre Sehergâh ve kendiden mütevellîde Sâliha nâm sagīre kızı mûrisim müteveffâ-yı mezbûrun terekesinden olup iki sehm-i şâyi‘i vâlidesi Senayi Hâtun’a ve üç sehm-i şâyi‘i kız karındaşı mezkûre Sitti’ye ve bir sehm-i şâyi‘i benim hisseme isâbet etmişdir hâlâ câriye-i mezkûrede ve sagīre kızı mezbûre Sâliha’da olan bir sehm-i şâyi‘imi hasbeten lillâhi’l-aliyyi’l-azîm ve taleben li-merzâti’r-rabbi’r-rahîm malımdan i‘tâk ve tahrîr eyledim ba‘de’l-yevm mezbûre Sehergâh ve kızı sagīre-i mezkûre Sâliha üzerlerinde hakk-ı velâdan gayrı hakkım kalmadı dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Tahrîren fi’l-yevmi’l-hâmis min şehri Ramazâni’l-mübârek li-sene seb‘a ve sittîn ve elf. Şühûdü’l-hâl: Ali Beşe b. Hamza, Bayram Beşe b. Oruc, Mehmed Beşe b. Abdullah, Osman Beşe b. Mehmed ve gayruhüm.