Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 90 Hüküm no: 9 Orijinal metin no: [2a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sinan Bey b. Mustafa’nın merhume Emine bt. Hüseyin’in kocası olup mirasında hak sahibi olduğunu ispat ettiği Mahmiye-i İstanbul’da Tarsus mahallesinde sâkine iken bundan akdem vefât eden Emine bt. Hüseyin nâm hâtunun zevc-i metrûkü Sinan Bey b. Mustafa nâm cündi meclis-i şer‘-i hatîr-i lâzimü’t-tevkīrde Ahmed Çavuş b. Ali mahzarında üzerine da‘vâ ve takrîr-i kelâm edip müteveffât-ı merkūme Emine’nin üç bin akçe mehr-i müeccel-i müsemmâ ile benim zevce-i menkûham iken vefât eyledikde ben Girid seferinde bulunmağla terekesinden nakid üç bin beş yüz akçesine mezbûr Ahmed Çavuş vaz‘-ı yed etmeğin hâlâ taleb ederim suâl olunsun dedikde gıbbe’s-suâl mezbûr Ahmed Çavuş cevâbında ben müteveffât-ı mezbûre Emine’yi hayâtında bin altı yüz akçe mehr-i müeccel-i müsemmâ ile tezevvüc ve kabûl eyledikden sonra vefât eyledikde cümle terekesi işbu defter-i kassâm-ı askerî nâtık olduğu üzere on dokuz bin sekiz yüz altmış akçeye bâliğ ve meblağ-ı mezbûrun altı bin altı yüz yirmi akçesi müteveffât-ı mezbûrenin vesâyâ-yı müsbetesi için ihrâc olundukdan sonra meblağ-ı bâkī on [üç] bin iki yüz kırk akçenin nısfı zevci olduğum ecilden bana ve nısf-ı âharı dahi benden gayrı zâhirde vâris-i ma‘rûfu olmamağla cânib-i beytü’l-mâla âid olmağla mecmû‘-ı meblağ-ı bâkīye beytü’l-mâl emîni olan ( ) Ağa vaz‘-ı yed edip ben dahi meblağ-ı mezbûrdan nısf hisse-i şer‘iyyeme isâbet eden altı bin altı yüz yirmi akçeyi da‘vâ ve taleb eylediğimde emîn-i mezbûr tereke-i müteveffât-ı mezbûreden beni iki bin beş yüz akçe üzerine sulh edip ben dahi kabz-ı bedel eylemişidim deyu tereke-i müteveffât-ı mezbûreden iki bin beş yüz akçeye vaz‘-ı yedini ikrâr ve ziyâde kabzını müdde‘î-i mezbûr bâlâda zikr olunduğu üzere müteveffât-ı merkūmenin zevci olduğunu inkâr edicek evvelâ müdde‘î-i mezbûr Sinan Bey’den müteveffât-ı merkūme vech-i muharrer üzere zevce-i menkûhası olduğunu mübeyyine beyyine taleb olundukda udûl-i Müslimînden mahalle-i mezbûre sükkânından Mehmed Beşe b. Ali ve Ali Beşe b. Mustafa ve Ali Efendi b. Mahmud nâm kimesneler li-ecli’ş-şehâde meclis-i şer‘a hâzırûn olup isre’l-istişhâd fi’l-vâki‘ müteveffât-ı merkūme Emine hayâtında üç bin akçe müvekkel [müeccel] ile nefsini müdde‘î-i mezbûr Sinan Bey’e bizim huzûrumuzda [2b] tezevvüc ve kabûl eylemişidi biz bu husûsa bu vech üzere şâhidleriz şehâdet ederiz deyu herbiri edâ-i şehâdet-i şer‘iyye eylediklerinde ba‘de ri‘âyeti şerâiti’l-kabûl şehâdetleri makbûle oldukdan sonra sâniyen mezbûr Ahmed Çavuş’un zikri mürûr eden vech üzere emîn-i beytü’l-mâlden hissesi mukābilesinde bi-tarîkı’s-sulh kabzına i‘tirâfı olan meblağ-ı mezbûr iki bin beş yüz akçeden ziyâde bin akçe dahi kabz eylediğini mübeyyine beyyine taleb olundukda udûl-i Müslimînden olup yine mahalle-i mezbûre sükkânından Mehmed Beşe b. Ali ve Ali Beşe b. Mustafa nâm kimesneler li-ecli’ş-şehâde meclis-i şer‘a hâzırûn olup gıbbe’l-istişhâd fi’l-hakīka mezbûr Ahmed Çavuş müteveffât-ı merkūmenin terekesine vaz‘-ı yed eden emîn-i beytü’l-mâl ile nısf hisse-i şer‘iyyesi mukābilesinde üç bin beş yüz akçeye sulh olup kabz-ı bedel-i sulh eyledi biz bu husûsa bu vech üzere şâhidleriz şehâdet dahi ederiz deyu herbiri edâ-i şehâdet eylediklerinde ba‘de ri‘âyeti şerâiti’l-kabûl şehâdetleri makbûle olmağın mûcibiyle hayâtında müteveffât-ı merkūmeyi tatlîk etmediğine müdde‘î-i mezbûr Sinan Bey’e yemîn teklîf olundu ol dahi hasbe’l-mes’ûl yemîn billâhi te‘âlâ etmeğin mûcibiyle meblağ-ı mezbûr üç bin beş yüz akçeye müteveffât-ı mezbûrenin zimmetinde ma‘kūdün-aleyh olan bin altı yüz akçe mehr-i müeccelinin nısfı olan sekiz yüz akçeyi ki cem‘an dört bin üç yüz akçeyi müdde‘î-i mezbûr Sinan Bey’e edâ ve teslîme mezbûr Ahmed Çavuş’a tenbîh olunup mâ-vaka‘a [bi’t-taleb] ketb olundu. Fi’l-yevmi’s-sâdis min şehri Ramazâni’l-mübârek li-sene seb‘a ve sittîn ve elf. Şühûdü’l-hâl: Hüseyin Çavuş b. Hasan el-mübâşir, Mustafa b. Mehmed, Mehmed b. Mustafa, Ali Beşe b. Mustafa, Mehmed Beşe b. Ali, Ali Efendi b. Mahmud ve gayruhüm.