Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 95 Hüküm no: 13 Orijinal metin no: [3a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tayfere bt. Petriyo’nun mülk bağını Tordoş v. Nikola’ya sattığı Havâss-ı aliyye kazasına tâbi‘Litros nâm karyede sâkine Tayfere bt. Petriyo nâm Nasrâniye mahfil-i kazâda işbu bâ‘isü’s-sifr Tordoş v. Nikola nâm zimmî muvâcehesinde ikrâr ve takrîr-i kelâm edip zikri âtî akdin sudûruna değin silk-i mülkümde münselik yedimde mülk ve hakkım olup karye-i mezbûrede vâki‘ bir tarafı Apostol bağı ve bir tarafı Dimitri bağı ve bir tarafı Talaş bağı ve bir tarafı bazen Nikola ve bazen tarîk-ı âm ile mahdûd bir dönüm mülk bağımı bi-cümleti’t-tevâbi‘ ve’l-levâhık ve kâffeti’l-hukūk ve’l-merâfık bin nakd-i râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile mezbûr Tordoş’a bey‘ ve teslîm ol dahi iştirâ ve kabûl ve kabz ve tesellüm eyledikden sonra semeni olan meblağ-ı mezbûr bin akçeyi müşterî-i mersûm yedinden tamâmen ahz u kabz eyledim min ba‘d mârrü’z-zikr bağ müşterî-i mersûm Tordoş’un mülk-i müşterâsıdır keyfe mâ yeşâ ve yahtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’r-râbi‘ min şehri Ramazâni’l-mübârek li-sene seb‘a ve sittîn ve elf. Şühûdü’l-hâl: Ca‘fer Çelebi b. Ahmed, Ali Beşe b. İbrahim, Osman Beşe b. Sevindik, Mehmed b. Hasan, İbrahim b. ( ) el-cündi ve gayruhüm mine’l-[hâzırîn.]