Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 94 Hüküm no: 12 Orijinal metin no: [3a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Aleksi v. Yorgi’nin çuka alım satımından kalan borcunun kefili Yamandi v. Şero’dan tahsili Mahmiye-i İstanbul’da çukacı tâifesinden olup Kalavrita cemâ‘atinden İsrail v. Şemoil nâm Yahudi meclis-i şer‘-i hatîr-i lâzimü’t-tevkīrde mahmiye-i mezkûrda Lanka kurbünde sâkin kuyumcu tâifesinden Yamandi v. Şero nâm zimmî mahzarında üzerine takrîr-i da‘vâ edip zikrolunan Lanka kurbünde bakkal tâifesinden işbu [hâzır] bi’l-meclis Aleksi v. Yorgi nâm zimmîye her zirâ‘ı beşer buçuk guruşa olmak üzere yetmiş beş guruşa on zirâ‘ benefş çuka ve her zirâ‘ı beşer guruşa olmak üzere yirmi beş guruşa beş zirâ‘ mor londrine çuka ve her zirâ‘ı sekizer guruş ile bir rub‘ guruşa olmak üzere kırk iki guruş ve bir rub‘ guruşa beş zirâ‘ erguvanî çuka ve her zirâ‘ı ikişer guruşa olmak üzere altı guruşa üç zirâ‘ erguvanî atlas ve beş guruşa bir erguvanî diz çakşırını safka-i vâhide ile cem‘an yüz elli iki riyâlî guruş ve bir rub‘ guruşa bey‘ ve teslîm ol dahi minvâl-i muharrer üzere iştirâ ve tesellüm eyledikden sonra zikrolunan yüz elli guruş ve bir rub‘ guruşun mecmû‘una mezkûr Yamandi emr ve kabûlü hâviye kefâlet ile kefîl olmuşidi hâlâ meblağ-ı mezkûru mezbûr Yamandi’den kefâleti hasebiyle [taleb ederim] suâl olunup alıverilmesi matlûbumdur dedikde gıbbe’s-suâl mezbûr Yamandi cevâbında mezkûr Aleksi’nin nefsine ve gaybet ederse meblağ-ı mezkûrdan ancak yetmiş beş guruşa kefîl oldum deyu meblağ-ı mezkûrun mecmû‘una kefâletini inkâr edicek müddeî-i mezbûrun müdde‘âsını mübeyyine beyyine taleb olundukda zikrolunan Lanka kurbünde sâkin hayyât tâifesinden Avanos v. Meravce ve yine tâife-i mezbûreden Serkis v. Sefer nâm zimmîler li-ecli’ş-şehâde meclis-i şer‘a hâzırân olup istişhâd olunduklarında fi’l-hakīka müdde‘î-i mezkûr İsrail’in mezkûr Aleksi zimmetinde olan yüz elli iki guruş ve bir rub‘ guruş hakkına mezkûr Yamandi bizim huzûrumuzda emr ve kabûlü hâvî kefâlet-i sahîha-i şer‘iyye ile kefîl oldu biz bu husûsa bu vech üzere şâhidleriz şehâdet dahi ederiz deyu herbiri edâ-i şehâdet-i şer‘iyye ettiklerinde gıbbe ri‘âyeti şerâiti’l-kabûl şehâdetleri makbûle olmağın meblağ-ı mezkûru müdde‘î-i [mezkûra] edâ ve teslîme kefâleti hasebiyle mezkûr Yamandi’ye tenbîh birle mâ-hüve’l-vâki‘ bi’t-taleb ketb olundu. Fi’l-yevmi’l-hâmis min şehri Ramazâni’l-mübârek li-sene seb‘a ve sittîn ve elf. Şühûdü’l-hâl: Müstakīm Çavuş el-mübâşir, Mustafa Çavuş b. Receb, İsa Bey b. Ahmed, İsmail b. Yunus ve gayru[hüm.]