Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 96 Hüküm no: 15 Orijinal metin no: [3b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Beşe b. İbrahim’in Mustafa b. Arslan aleyhine açtığı alacak davasında iddiasını ispat edemediği Gemici tâifesinden İbrahim Beşe b. İbrahim meclis-i şer‘-i hatîr-i lâzimü’t-tevkīrde işbu bâ‘isü’l-vesîka Mustafa b. Arslan mahzarında üzerine da‘vâ ve takrîr-i kelâm edip mezbûr Mustafa bundan akdem benden altı yüz akçe bi-gayrı hakkın ahz u kabz eylemekle hâlâ taleb ederim suâl olunsun dedikde gıbbe’s-suâl mezbûr Mustafa cevâbında müdde‘î-i mezbûr İbrahim Beşe’yi târih-i kitâbdan üç ay mukaddem bir kara saplı bıçak ile sağ dizinin üzerine urup mecrûh etmekle ben dahi mûcib-i şer‘îsini mezbûr İbrahim Beşe’den da‘vâ ve taleb eylediğimde beynimize muslihûn tavassut edip da‘vâ-yı mezbûreden beni mezbûr İbrahim Beşe ile meblağ-ı mezbûr altı yüz akçe üzerine sulh edip ben dahi sulh-ı mezbûru kabûl ve bedel-i sulh olan meblağ-ı mezbûr altı yüz akçeyi mezbûr İbrahim yedinden ahz u kabz edip da‘vâ-yı mezbûreden zimmetini ibrâ eylemişidim deyu meblağ-ı mezbûru ahz u kabz eylediğini ikrâr vech-i muharrer üzere def‘le mukābile edicek akībe’l-istintâk ve’l-inkâr mezbûr Mustafa’dan def‘-i mezbûrunu mübeyyine beyyine taleb olundukda udûl-i Müslimînden olup mahmiye-i İstanbul hısnı ebvâbından Fenerkapısı yasakçılarından Ahmed Beşe b. Halil ve Osman b. Süleyman ve İbrahim Beşe b. Abdullah ve Mustafa Beşe b. Mehmed nâm kimesneler li-ecli’ş-şehâde meclis-i şer‘a hâzırûn olup istişhâd olunduklarında fi’l-hakīka müdde‘î-i mezbûr İbrahim Beşe târih-i mezbûrda merkūm Mustafa’yı vech-i muharrer üzere urup mecrûh edip ol dahi mûcib-i şer‘îsini mezbûr İbrahim Beşe’den da‘vâ ve taleb eyledikde mezbûr Mustafa merkūm İbrahim Beşe ile da‘vâ-yı mezbûreden bizim huzûrumuzda meblağ-ı mezbûr altı yüz akçe üzerine sulh ve kabz-ı bedel-i [sulh] eyleyip da‘vâ-yı mezbûreden zimmetini [ibrâ] eylemişidi biz bu husûsa bu vech üzere şâhidleriz şehâdet dahi ederiz deyu herbiri edâ-i şehâdet-i şer‘iyye eylediklerinde ba‘de ri‘âyeti şerâiti’l-kabûl şehâdetleri makbûle olmağın mûcibiyle müdde‘î-i mezbûr İbrahim Beşe bî-vech mu‘ârazadan men‘ olunup mâ-vaka‘a bi’t-taleb ketb olundu. Fi’l-yevmi’s-sâdis min şehri Ramazâni’l-mübârek li-sene seb‘a ve sittîn ve elf. Şühûdü’l-hâl: İbrahim Beş b. Ömer, Osman Beşe b. Sevindik, Ca‘fer b. Abdullah, İsa Bey b. Ahmed ve gayruhüm mine’l-[hâzırîn.]