Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 96 Hüküm no: 16 Orijinal metin no: [3b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Servinaz bt. Abdullah’ın ev hissesini oğlu Ahmed Çelebi’ye sattığı Mahmiye-i İstanbul’da Karabaş mahallesinde sâkin olup bundan akdem vefât eden Mustafa Çelebi b. Hasan’ın verâseti vâlidesi Servinaz bt. Abdullah nâm hâtuna ve li-eb er karındaşları Ahmed Çelebi ve Hasan Çelebi’ye veli-eb kız karındaşı Havvâ nâm hâtuna münhasıra olup tereke-i müteveffâ-yı mezbûr altı sehimden i‘tibâr olunup sihâm-ı merkūmeden biri vâlidesi merkūme Servinaz’a, ikişer sehmi mezbûrân Ahmed ve Hasan Çelebi’ye ve sehm-i vâhidi merkūme Havvâ’ya isâbet ettiği şer‘an mütehakkık oldukdan sonra mezbûre Servinaz meclis-i şer‘-i hatîrde sâhibü hâze’l-kitâb mezkûr Ahmed Çelebi mahzarında tav‘an ikrâr ve i‘tirâf edip mahalle-i mezbûrede vâki‘ olup bir tarafdan mezbûrân Hasan Çelebi ve Havvâ’nın mülk-i mevrûsları olan menzile ve bir tarafdan merhûm Hâfız Paşa bahçesine ve bir tarafdan Ali Çelebi Odaları demekle ma‘rûf odalara ve bir tarafdan tarîk-ı âmma müntehî olup mûrisimiz mezbûrdan ikimize intikāl etmekle zikri [âtî] akdin sudûruna değin silk-i mülkümüzde olup büyût-ı müte‘addideyi müştemil olan cemî‘ mülk menzilden hisse-i şâyi‘amı kâffe-i hukūk ve merâfıkı ile merkūm Ahmed Çelebi’ye beş bin beş yüz seksen bir râyic [fi’l]-vakt akçeye tarafeynden îcâb ve kabûlü hâvî bey‘-i bâtt-ı sahîh ile bey‘ ve teslîm edip merkūm Ahmed Çelebi dahi nefsi’çün iştirâ ve kabûl ve tesellüm ettikden sonra semen-i merkūm beş bin beş yüz seksen bir akçeden merkūm Ahmed Çelebi’nin zimmetini ibrâ-i âmm-ı kātı‘u’n-nizâ‘la ibrâ ve ıskāt eyledim min ba‘d cemî‘ menzil-i mezbûrdan benim hisse-i şâyi‘am dahi merkūm Ahmed Çelebi’nin mülk-i müşterâsıdır keyfe mâ yeşâ ve yahtâr mutasarrıf olsun dedikde mukırre-i mezbûreyi vech-i meşrûh üzere cârî ve sâdır olan ikrârında el-mukarru lehü’l-mezbûr Ahmed Çelebi dahi bi’l-müvâcehe tahkīk ve bi’l-müşâfehe tasdîk edicek mâ-hüve’l-vâki‘ bi’t-taleb ketb olunup men lehü’l-taleb yedine def‘ olundu. Fi’l-yevmi’s-sâdis min şehri Ramazâni’l-mübârek li-sene seb‘a ve sittîn ve elf. Şühûdü’l-hâl: Ramazan Efendi b. Mehmed el-imâm, Abdullah Çelebi b. Ramazan Efendi, Hüseyin Bey b. Abdullah el-cündi, Hüseyin Bey b. ( ) el-cündi, Mustafa Bey b. Ali, Nasûh b. Nasûh.