Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 101 Hüküm no: 21 Orijinal metin no: [4b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kasandra bt. Drako’nun üzerine büyükannesi Gorane bt. İspilob’un vasi tayin olunduğu Mahmiye-i İstanbul’da Samatyakapısı kurbünde el-Hâc Hüseyin mahallesi sükkânından olup bundan akdem hâlik olan Drako v. Kostanti ile merkūm Drako’nun zevcesi olup hâlike olan Sane bt. Milod’dan tevellüd eden Kasandra nâm sagīre babası ve anası hâlikân-ı mezbûrân Drako ve Sane’den irs-i şer‘ ile intikāl eden mâlını zabta vasîsi olmayıp bir vasî nasb olunması şer‘an lâzım ve mühim olmağın hâkim-i muvakkı‘-ı sadr-ı kitâb tûbâ lehü ve hüsnü-meâb hazretleri dahi sagīr-i mezbûrun babası hâlik-i mezbûrun anası olan hâmiletü hâze’l-kitâb Gorane bt. İspilob nâm Nasrâniyeyi her vechile sagīr-i mezbûra enfa‘ olmağla avân-ı rüşdine değin babası ve anası hâlikân-ı mezbûrândan intikāl eden mâlı zabta ve hâlini hıfza vasî nasb ü ta‘yîn edip kalîl ve kesîre cemî‘ umûrunu tesviyeye sagīr-i mezbûra hayırlı olan celîl ve hakīr eşyâyı bey‘ ü şirâya izin verdiklerinde merkūme Gorane dahi vesâyet-i merkūmeyi kabûl ve hizmet-i lâzımesini edâya müte‘ahhide olmağın mâ-hüve’l-vâki‘ bi’t-taleb ketb olunup men lehâ’t-taleb yedine def‘ olundu. Fi’l-yevmi ( ) min şehri Ramazâni’l-mübârek li-sene seb‘a ve sittîn ve elf. Şühûdü’l-hâl: Salih Efendi b. Salih el-kâtib, Mehmed Efendi b. Veli Efendi, Muslı Çelebi b. Kalender, Hudaverdi Ağa el-cündi, Mustafa Çelebi b. Abdullah, İsa Bey b. Ahmed el-muhzır ve gayruhüm.