Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 99 Hüküm no: 20 Orijinal metin no: [4a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacı Süleyman Beşe b. İbrahim’in Belkız bt. Vasil’e verdiği borca kefaletinden dolayı Mustafa Ağa b. Abdülmennan’dan alacaklı olduğu Dergâh-ı âlî yeniçerileri mumcularından olup mahmiye-i İstanbul’da Hoca Kasım Gönani mahallesi sükkânından olan sâhibü hâze’l-kitâb el-Hâc Süleyman Beşe b. İbrahim meclis-i şer‘-i hatîrde mahmiye-i mezbûrede Hâcı Timur mahallesinde sâkin Gümüşarayıcı Mustafa Ağa b. Abdülmennân mahzarında üzerine takrîr-i da‘vâ edip merkūm Mustafa Ağa’nın kayınanası olup mahalle-i mezbûrede sâkine olan gāib ani’l-meclis Belkız bt. Vasil nâm Nasrâniye mezkûr el-Hâc Timur mahallesinde vâki‘ hudûdu beynimizde ma‘lûm büyût-ı müte‘addideyi müştemil mülk menzilini kâffe-i hukūkuyla bin altmış altı Recebi’nin dördüncü gününde tarafeynden îcâb ve kabûlü hâvî bey‘ ile dört yüz riyâlî guruşa bi-tarîkı’l-istiğlâl bana bey‘ ve teslîm ve kabz-ı semen ettikden sonra ba‘de’t-tahliyeti’ş-şer‘iyye menzil-i mezkûru târih-i mezbûrdan bir sene tamâmına değin yevmî on yedişer buçuk akçeden beher mâh beş yüz yirmi beş akçeye merkūme Belkız’a îcâr ve teslîm edip ol dahi istîcâr ve tesellüm ettikden sonra meblağ-ı merkūm dört yüz riyâlî guruş ile ücret-i menzil-i merkūme merkūm Mustafa Ağa ile gāibûn ani’l-meclis Kosta v. Yorgi ve merkūme Belkız’ın sadrî kebîr oğlu İstati v. Aleksi ve mahalle-i mezbûreden Yani v. Marat nâm zimmîlerden herbiri tarafeynden emr ve kabûlü hâviye kefâlet-i sahîha-i şer‘iyye ile kefîl olmuşlar idi hattâ hâl minvâl-i muharrer üzere olduğuna husûs-ı mezbûru mahallinde tahrîr için mahmiye-i mezbûrede Mahmudpaşa Mahkemesi’nde müvellâ-hilâfe olan Mevlânâ Ali Efendi b. Derviş Mehmed tarafından bi’l-iltimâs irsâl olunan Mevlânâ Mahmud Efendi huzûrunda menzil-i mezkûrda akd eylediği meclis-i şer‘de herbiri tav‘an i‘tirâf dahi etmişlerdir akd-i mezbûr hakīkatde rehin olmağla ba‘de’l-fek meblağ-ı mezkûr dört yüz riyâlî guruş hakkım ile icâre-i menzil-i mezbûrdan yevm-i akd-i îcârdan işbu bin altmış yedi Şa‘bânı gāyetine değin beher yevm on yedişer buçuk akçeden on üç ay ile yirmi altı günde merkūme Belkız üzerine mecmû‘ olan yedi bin iki yüz seksen akçe hakkımı kefâlet-i meşrûhasına binâen merkūm Mustafa Ağa’dan taleb ederim suâl olunsun deyu mazmûnu min külli’l-vücûh takrîrini nâtık ve mevlânâ-yı mezkûrun [4b] imzâ ve hatemini hâviye hüccet-i şer‘iyye ibrâz edip merkūm Mustafa Ağa muvâcehesinde feth u kırâat ve istintâk olundukda merkūm Mustafa Ağa mazmûn-ı hüccet-i mezkûreyi bi’l-külliyye tav‘an ikrâr ve i‘tirâf edicek i‘tirâfı mûcebince meblağ-ı mezkûr dört yüz riyâlî guruş ile ücret-i menzil-i mezbûrdan vech-i meşrûh üzere müctemi‘ olan meblağ-ı mezkûr yedi bin iki yüz seksen akçeyi müdde‘î-i merkūm el-Hâc Süleyman Beşe’ye edâ ile merkūm Mustafa Ağa üzerine kefâlet-i meşrûhasına binâen muvâcehesinde hükm-i sahîh-i şer‘î kılınıp mâ-hüve’l-vâki‘ bi’t-taleb ketb olundu. Fi’l-yevmi’s-sânî min şehri Ramazâni’l-mübârek li-sene seb‘a ve sittîn ve elf. Şühûdü’l-hâl: Umdetü kuzâti’l-İslâm Abdullah Efendi eş-şehîr bi-Uşşâkīzâde, Mehmed Efendi b. Veli el-kādî, Mustafa Çelebi b. Safâ, İsa Bey b. Ahmed, el-Hâc Ca‘fer b. Abdullah el-muhzır, Ali Beşe b. Sevindik, Osman Beşe çukadâr.