Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 102 Hüküm no: 24 Orijinal metin no: [4b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Ağa b. Himmet’in ortağı Muslı Bey b. Abdünnebi ile muhâsebelerini görüp birbirlerinin zimmetlerini ibra ettikleri Vilâyet-i Anadolu’da Manyas kazâsına tâbi‘ Haydar nâm karye sâkinlerinden Sakkāzâde demekle ma‘rûf Mustafa Ağa b. Himmet meclis-i şer‘-i hatîr-i lâzimü’t-tevkīrde vilâyet-i mezbûrede Alaşehir nâm kasaba mahallâtından Eskiçarşı mahallesi sâkinlerinden Muslı Bey b. Abdünnebi mahzarında ikrâr ve takrîr-i kelâm edip Alaşehir ve Kütahya kazâlarında batınca ta‘bîr olunur hizmeti bin elli sekiz târihinde vezîr-i a‘zam iken maktûlen fevt olan Ahmed Paşa’dan mezbûr Muslı Bey ile ale’l-iştirâk iki bin dört yüz yetmiş kıt‘a riyâlî guruşa ta‘ahhüd ve iltizâm eylediğimizden sonra sene-i mezbûrede varıp zikrolunan hizmeti ikimiz cem‘ ve tahsîl ve ba‘dehû beynimiz[de] muhâsebe eylediğimizde zikrolunan hizmetin asl-ı mâl ve fâidesinden şerîkim merkūm Muslı Bey zimmetinde bana âid bir akçe ve bir habbe kal[ma]mışdır dedikde mezkûr Muslı Bey dahi meclis-i [şer‘de] merkūm Mustafa Ağa mahzarında ikrâr edip fi’l-hakīka şerîkim mezbûr Mustafa Ağa ile beynimizde muhâsebe eylediğimizde zikrolunan hizmetin asl-ı mâl ve fâidesinden mezkûr Mustafa Ağa zimmetine bana âid bir akçe ve bir habbe kal[ma]mışdır dedikde gıbbe’t-tesâdukı’l-vicâhî mâ-hüve’l-vâki‘ bi’t-taleb ketb olundu. Fi’l-yevmi’s-sâmin min Ramazâni’l-mübârek li-sene seb‘a ve sittîn ve elf. Şühûdü’l-hâl: Hüseyin b. Mehmed et-tabbâh, Mehmed b. Sefer el-imâm, Ahmed Çelebi b. Mustafa, Musa Dede b. Ahmed, Emrullah Çelebi b. Derviş, Mehmed Ali Çelebi b. el-Hâc Ahmed, Bayram b. Mehmed, el-Hâc Mehmed b. Ahmed, Kara İbrahim b. Abdullah.