Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 121 Hüküm no: 46 Orijinal metin no: [8b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şaban Ağa b. Receb’in Abdullah Efendi’den çuka bedeli olarak sekiz bin akçe alacağı olduğu Mahmiye-i İstanbul’da Lütfi Paşa mahallesi sükkânından olan Şa‘ban Ağa b. Receb tarafından zikri âtî husûmete vekîl olup vekâleti yine mahalle-i mezbûre ahâlîsinden olan Ömer Bey ve Osman ibney Mehmed şehâdetleri ile şer‘an sâbite olan bâ‘isü hâze’l-kitâb Mehmed Bey b. İbrahim meclis-i şer‘-i hatîrde Vilâyet-i Rumeli’nde vâki‘ Horpeşte kasabası sükkânından olup Ohri kazâsı muvakkiti olan Abdullah Efendi b. ( ) mahzarında bi’l-vekâle üzerine takrîr-i da‘vâ edip müvekkilim mezbûr Şa‘ban Ağa bin altmış beş senesi Muharremü’l-harâmı evâilinde Horpeşte kazâsı keferesi cizyedârı iken mezbûr Abdullah Efendi müvekkilim merkūm yedinden kırk üç zirâ‘ ve iki rub‘ elvân-ı mütenevvi‘a iskarlat çukasını târih-i mezbûrdan bir sene tamâmına değin müeccel olmak üzere on iki bin râyic [fi’l]-vakt akçeye iştirâ ve kabûl edip hattâ merkūm Abdullah Efendi müvekkilim mezbûr Şa‘ban Ağa muvâcehesinde târih-i mezbûrda kasaba-i mezbûrede kādı olan Mevlânâ Ahmed Efendi b. Hüseyin huzûrunda vech-i muharrer üzere on iki bin akçe deyni olduğuna ikrâr ve yedine hüccet dahi vermekle meblağ-ı mezbûrdan dört bin akçesini bana teslîm edip ben dahi kabz edip bâkī sekiz bin akçe kalmışidi hâlâ meblağ-ı bâkī sekiz bin akçeyi dahi bi’l-vekâle taleb ederim suâl olunsun deyu târih-i mezkûr ile müverraha ve merkūm Abdullah Efendi’nin minvâl-i meşrûh üzere ikrârını hâviye ve mevlânâ-yı mûmâ-ileyhin imzâsıyla mümzâ ve hatemi ile mahtûme hüccet-i şer‘iyye ibrâz edip merkūm Abdullah Efendi mahzarında feth u kırâat ve istintâk olundukda cevâbında fi’l-hakīka minvâl-i muharrer üzere müvekkil-i merkūm Şa‘ban Ağa’ya vech-i meşrûh üzere zimmetimde olan iki bin akçe deynim vardır deyu i‘tirâf ve dört bin akçesini vekîl-i merkūma def‘ ve teslîm etmişidim lâkin ikrârımda kâzibim deyicek müvekkil-i mezbûr Şa‘ban Ağa’ya merkūm Abdullah Efendi ikrâr-ı meşrûhunda kâzib olmayıp da‘vâsında mubtil olmadığına yemîn müteveccih olundu lâkin müvekkil-i mezbûr âhar diyârda olup li-ecli’t-tahlîf huzûru müte‘azzir olmağın vech-i meşrûh üzere tahlîfi ile’z-zafer şer‘an te’hîr olunup mezbûr Abdullah Efendi’nin i‘tirâfı mûcebince meblağ-ı bâkī-i mezkûr sekiz bin akçeyi merkūm Mehmed Bey’e edâ ile hükmolundu mâ-hüve’l-vâki‘ bi’t-taleb ketb olundu. Fi’l-yevmi’t-tâsi‘ min şehri Ramazâni’l-mübârek li-sene seb‘a ve sittîn ve elf. Şühûdü’l-hâl: İbrahim Bey b. Arslan, İsmail Çelebi el-muhzır, Ali Bey, Ca‘fer Bey, Osman Beşe çukadâr ve gayruhüm.