Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 122 Hüküm no: 47 Orijinal metin no: [9a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. David v. Avraham’ın Karabaş mahallesindeki menzil hissesini Mosi’nin oğulları Yako ve Yasef’e sattığı Mahmiye-i İstanbul’da hısnı ebvâbından Balatkapısı hâricinde Karabaş mahallesinde sâkin Siroz cemâ‘atinden David v. Avraham nâm Yahudi meclis-i şer‘-i hatîr-i lâzimü’t-tevkīrde cemâ‘at-i mezkûreden işbu râfi‘ayi’l-kitâb Yako ve Yasef veledey Mosi nâm Yahudiler mahzarlarında tav‘an ikrâr ve i‘tirâf, babam hâlik-i mezbûr Avraham’ın terekesinden olup mahalle-i mezkûrede vâki‘ bir tarafdan Yako v. [Ya]sef mülküne ve bir tarafdan Yasef v. İsak mülküne ve bir tarafdan sâhil-i bahre ve bir tarafdan [tarîk-ı] âmma müntehî olup büyût-ı adîdeyi ve fırını ve su kuyusunu müştemil olan menzil dört sehm i‘tibâr olunup sihâm-ı mezkûreden bir sehm bana ve üç sehmi karındaşlarım Mosi ve Yehva ve Yehil nâm Yahudilere isâbet eylediği mütehakkık oldukdan sonra zikrolunan menzilden bi-hasebi’l-irsi’ş-şer‘î benim hisseme isâbet eden üç yüz seksen beş zirâ‘ arsa üzerinde mebnî iki bâb fevkānî odayı ve bir matbahı ve deryâ üzerinde mebnî iki bâb odayı ve müşterek su kuyusunu ve bahçeyi müştemil olan cemî‘ mülk-i mevrûsumu kâffe-i hukūk ve merâfıkıyla mezkûrân Yako ve Yasef’e dokuz riyâlî guruşa tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm edip onlar dahi ale’l-iştirâki’s-seviyye iştirâ ve tesellüm eylediklerinden sonra semeni olan meblağ-ı mezkûru mezbûrân Yako ve Yasef yedlerinden tamâmen ahz u kabz eyledim ba‘de’l-yevm zikrolunan menzilden benim mülk-i mevrûsum olan rub‘-ı şâyi‘i mezkûrân Yako ve Yasef’in mülk-i müşterâları ve hakk-ı sırflarıdır keyfe mâ yeşâ ve yahtâr mutasarrıf olsunlar dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Tahrîren fi’l-yevmi’s-sâlis aşer min şehri Ramazâni’l-mübârek li-sene seb‘a ve sittîn ve elf. Şühûdü’l-hâl: Mahmud Çavuş b. Osman, İsa Bey b. Ahmed, İsmail b. Yunus, Osman Beşe çukadâr ve gayruhüm mine’l-hâzır[în].