Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 123 Hüküm no: 49 Orijinal metin no: [9a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ümmühani bt. Mustafa’ya, Solak Ali Bey b. Mustafa’ya sattığı cariyenin ayıplı çıkması üzerine aldığı parayı ödemesi için iki ay süre verildiği Husûs-ı âti’l-beyânın mahallinde tahrîri iltimâs olunmağın cânib-i şer‘-i mutahhardan Mevlânâ Salih Efendi b. Salih irsâl olunup ol dahi mahmiye-i İstanbul’da Âhi Çelebi mahallesinde Solak Ali Bey b. Mustafa’nın menziline varıp zeyl-i kitâbda isimleri mastûr Müslimîn huzûrunda akd-i meclis-i şer‘-i şerîf etdikde mahmiye-i mezkûrede Tercümân Yunus mahallesi ahâlîsinden Rıdvan Ağazâde Mustafa Ağa zevcesi Ümmühani bt. Mustafa nâm hâtun meclis-i ma‘kūd-i mezkûrda mezkûr Solak Ali Bey mahzarında bi-tav‘ihâ ikrâr ve takrîr-i kelâm edip bundan akdem mezbûr Ali Bey’e silk-i mülkümde muntazam işbu orta boylu açık kaşlı göğ elâ gözlü Rusiyyetü’l-asl Cenane bt. Abdullah nâm memlûke câriyemi cemî‘ uyûbdan sâlime olmak üzere doksan beş riyâlî guruşa bey‘ ve teslîm edip ol dahi minvâl-i muharrer üzere iştirâ ve tesellüm eyledikden sonra mezkûr Ali Bey câriye-i mezkûrenin sar‘a ta‘bîr olunur ayb-ı kadîmine muttali‘ olup üzerime red murâd eyledikde hâlâ bey‘-i mezkûr rızâlarımız ile fesh [ve] ikāle olunup câriye-i mezkûreyi yedinden ahz u kabz edip semeni olan meblağ-ı mezkûr doksan beş guruşu kendi masârıfima sarfla istihlâk etmekle hâlâ edâya kudretim olmamağın mezkûr Ali Bey semen-i mezkûru târih-i kitâbdan altmış gün tamâmına değin te’cîl edip meblağ-ı mezkûr doksan beş guruş târih-i kitâbdan altmış gün tamâmına değin müeccel-i mezkûr Ali Bey’e zimmetimde lâzimü’l-edâ deynimdir dedikde gıbbe’t-tasdîkı’ş-şer‘î mevlânâ-yı mezkûr vâki‘-i hâli mahallinde tahrîr edip ba‘dehû meclis-i şer‘a gelip vukū‘u üzere inhâ ve takrîr etmeğin mâ-vaka‘a bi’t-taleb ketb olundu. Tahrîren fi’l-yevmi’l-hâmis aşer min şehri Ramazâni’l-mübârek li-sene seb‘a ve sittîn ve elf. Şühûdü’l-hâl: Abdullah Çavuş b. Mustafa, Salih b. Abdullah, el-Hâc Ahmed b. Hâcı Hüseyin, Halil b. Ali, Kadri Subaşı b. Mehmed ve gayruhüm mine’l-hâzırîn.